Toqaev shendilerdi shegirtkege teńedi

Qazaqstan prezıdenti Qasym-Jomart Toqaev memlekettik basqarý  júıesindegi "komandamen aýysý" problemasyn qozǵady. Bul týraly ol búgin, 15 qańtarda Aqordada prezıdenttik kadr rezervine kirgen jastarmen ótkizgen kezdesýinde aıtty dep jazady Qamshy.kz aqparat agenttigi sputniknews.kz saıtynyń deregin negizge alyp. 

Prezıdenttiń aıtýynsha, memlekettik qyzmette "komandamen aýysý" áli de óte ózekti másele bolyp otyr.

"Memlekettik organdardaǵy aýysý kórsetkishi, jalpy alǵanda, norma sheginde – 6-10%. Shyn máninde, mınıstr nemese ákim aýysqan kezde, kadrlyq quram da ájeptáýir ózgeretini barshaǵa aıan", - dedi Toqaev.  

Prezıdent memlekettik basqarý júıesinde merıtokratııa prınsıpteri únemi saqtala bermeıtinin atap ótti.

"Áli kúnge deıin qyzmette tanys arqyly, yqpaldy qamqorshylar arqyly kóterilý jaǵdaılary kezdesedi. Bul shyndyq qoı. Muny bárimiz de bilemiz. Buǵan jol berýge bolmaıdy. Mundaı júıeni qatań synǵa alyp, analız júrgizgen jón. Qoǵamnyń pikirin de eskerý qajet", - dedi memleket basshysy.

Onyń aıtýynsha, keıbir memlekettik qyzmetkerler eski júıeden shyǵa almaı, eldegi jańǵyrý prosesterin tejeıdi.

"Vedomstvolar men bólimshelerdiń basshylary shegirtke sııaqty bir qyzmetten basqasyna sekirip júr. Sol sebepti Qazaqstanǵa qoǵamnyń talaptaryna jaýap beretin tıimdi ári ádil memlekettik basqarý modeli qajet", - dedi prezıdent.