AQSh-tyń Iran shabýylyna jaýap bermeýiniń 3 sebebi

Tramptyń keshegi tikeleı efırde bergen málimdemesinen AQSh-tyń saıası kóregendigi taǵy da baıqaldy. Másele tek AQSh-tyń álemdik narazylyq jáne Iranmen soǵystan qaımyǵýynda emes. Onyń Iran shabýylyna jaýap bermeýiniń birneshe sebepteri bar ekenin eskergen jón.

 

Birinshiden, AQSh adam ómirin kóbirek baǵalaıdy. Tram óz málimdemesinde osyny qaıta eske salyp, óz sarbazdarynyń ólimge bas tigýin qalamaıtynyn kórsetti. Al soǵys degenimiz – orasan zor adam shyǵynyna ákelip soǵýy bek múmkin. Sondaı-aq mundaı soǵys AQSh azamattarynyń arasynda narazylyq týdyrady. Basqa memleket azamattarynyń soǵys saldarynan ólimge dýshar bolýy da álemdegi narazylyqty arttyrady. Bul da AQSh-tyń prestıjine paıda ákelmeıdi.

 

Ekinshiden, bul – Parsy shyǵanaǵy men Orta jáne Taıaý Shyǵystaǵy saıası ári ekonomıkalyq axýaldy turaqsyzdyqqa ákelip soqtyrýy múmkin. AQSh – Iran soǵysy bolǵan jaǵdaıda aımaqtaǵy qarqyndy damyp kele jatqan BAÁ, Katar, Oman, Lıvannyń damýyna nuqsan keledi. Saıası turaqsyz Irak pen Sırııa belgisiz ýaqyt aralyǵynda soǵys arenasyna aınalady.  Sondaı-aq aımaqtaǵy odaqtastardyń AQSh ustanymyn qoldamaýy – soǵystyń aldyn aldy dese de bolady. Mysaly, Izraıl bul qaqtyǵys bastalysymen óziniń áýe keńistigin jabyq dep jarııalap, AQSh-qa eshqandaı kómek kórsetpeıtinin málimdedi. Al Túrkııa óziniń bul jaǵdaıǵa qatysty resmı ustanymyn jarııalamady. Al soǵys bola qoıǵan jaǵdaıda budan da zor teris nátıjelerdi kórsetýi múmkin edi. Mysaly, aımaqta soǵystan zardap shekken elderden mıllıondaǵan bosqyndar qaıtadan Túrkııa men Eýropa elderine baryp bas saýǵalaıtyn edi. Al bul atalmysh elderdegi áleýmettik ári saıası turaqsyzdyqqa soqtyrýy múmkin. Túrkııa onsyz da Sırııadan 4-5 mıllıon shamasynda bosqyn qabyldady. Eýropa elderiniń ózderi Sırııadan kelgen bosqyndardan sharshady.

 

Úshinshiden, munaı baǵasynyń órshýiniń qaýpi de AQSh-qa tıimsiz. Al bul kerisinshe, Reseı federasııasyna tıimdi edi. Eýropa elderi Reseı arqyly keletin energoresýrstarǵa táýeldi bolyp, AQSh-tyń Eýropadaǵy yqpalynyń azaıýy múmkin edi. Sol sebepti de AQSh úkimeti ózine tıimdi joldy tańdady.