Apellıasııa soty túrmege qamalǵan jýrnalısti aqtap, keshirim surady

Qańtardyń 9-y kúni Túrkistan oblystyq sotynyń apellıasııa alqasy jergilikti Keles aýdany bilim bóliminiń basshysy, jábirlenýshi Bahtııar Abdıevke "jala jaýyp", "qorlaǵan" degen aıyppen 2 jyl 3 aıǵa túrmege qamalǵan "Saryaǵash ınfo" gazetiniń bas redaktory ári "Saryaǵash-Ádilet" qoǵamdyq birlestiginiń tóraǵasy Amangeldi Batyrbekovti aqtady.

"Amangeldi Batyrbekov Qylmystyq kodekstiń 130-babynyń 3-bólimi ("Jala jabý") jáne 131-babynyń 2-bólimi ("Qorlaý") boıynsha kinásiz dep tanylyp, (onyń is-áreketinde) qylmys quramynyń bolmaýyna baılanysty aqtalsyn. Batyrbekov sot zalynda dereý qamaýdan bosatylsyn" dedi úkimdi oqyǵan oblystyq sot alqasynyń tóraǵasy Taýbaı Qadyrbaev. Sýdıa jýrnalıstiń shekken zııandy óndirip alý týraly shaǵym berýge quqyǵy bar ekenin habarlady.

Qamaýda otyrǵan 54 jastaǵy Amangeldi Batyrbekovti qoldaýǵa Túrkistanǵa Qazaqstannyń ár aımaǵynan kelgen ondaǵan adam sot sheshimine rızalyǵyn bildirip, "Ádildik jasasyn!" dep aıǵaılady. Sot alqasynyń tóraǵasy Qadyrbaev ótken jylǵy qyrkúıektiń 23-inen beri qamaýda otyrǵan Amangeldi Batyrbekovten memlekettiń jáne sottyń atynan keshirim surady.

Sot zalynan bostandyqqa shyqqan soń Amangeldi Batyrbekov qysqasha suhbat berdi.

- Sottyń qara qyldy qaq jaryp ádil sheshim shyǵarǵanyna rızamyn. Meni qoldaǵan Qazaqstannyń ishi men syrtyndaǵy barsha jurtqa, "Ádil sóz" qoryna alǵysymdy bildiremin, - dedi Batyrbekov.

О́zine qarsy sot prosesin kásibı qyzmetimen baılanystyrǵan ol jumysyn ary qaraı da jalǵastyra beretinin aıtty.

– Munyń artynda turǵan - sybaılas jemqorlyqqa qarsy kúresim. Keýdemde janym turǵanda sybaılas jemqorlyqqa qarsy kúresti jalǵastyramyn, - dep málimdedi jýrnalıst, qoǵamdyq uıym jetekshisi Batyrbekov.

Amangeldi Batyrbekovtiń áleýmettik jelide jarııalaǵan jazbalary óz ar-namysyna tıip, qorlaǵanyn aıtyp, sotqa shaǵymdanǵan jábirlenýshi, Keles aýdany bilim bóliminiń basshysy Bahtııar Abdıev beısenbidegi oblystyq sot sheshimin Saryaǵash aýdany sotynan beınebaılanys arqyly tyńdady. Sot sheshimi jarııalaǵannan keıin pikirin suraǵan jýrnalıstke "ázirge pikir bildirýge daıyn emesin" aıtty. Onyń advokaty Gúljan Abdýkalıkova bul jolǵy otyrysqa qatysqan joq. Ekeýi de sot prosesi kezinde ózderin sýret pen vıdeoǵa túsirýge qarsy boldy.

Qańtardyń 8-i kúni oblystyq sot alqasynyń otyrysyndaǵy jaryssóz kezinde jábirlenýshi Bahtııar Abdıev aýdandyq sottyń úkimin kúshinde qaldyryp, Batyrbekovtiń apellıasııa shaǵymyn qanaǵattandyrmaýdy suraǵan edi. Onyń advokaty Gúljan Abdýkalıkova Batyrbekov pen onyń qorǵaýshylarynyń ýájderimen múlde kelispeıtinin, aýdandyq sot zańdy úkim shyǵardy dep sanaıtynyn aıtqan.

"Batyrbekov Abdıevtiń sońynan sham alyp túsip, kimniń quqyǵyn buzyp, qorǵap júrgeni belgisiz. Bir emes, on bir ret "Kelestegi keńkelestik" degen taqyryppen jazba jarııalady. Bul – qasaqana qýdalaý, qylmysty qasaqana jasaǵanyn bildiredi. Batyrbekovke bireýdi kemsitýge, qorlaýǵa, muqatýǵa, jala jabýǵa kim quqyq berdi? "Týpoı" degen sóz qorlaýǵa jatpaıdy deıdi. Belgisiz bireýge silteme jasadym dep jaýapkershilikten qashyp, aılaǵa saldy. Syn maqalalardy jazsyn. Biraq syn maqala jazý - bireýdi qorlaý degen sóz emes. Qolymen istegendi moınymen kótere bilýi kerek" dedi advokat jaryssóz kezinde.