Jas Alash gazetiniń bas redaktory aýysty

Keler jyly shyǵa bastaǵanyna 100 jyl tolatyn basylymnyń basshylyǵyna jýrnalıst Inga Imanbaı keldi. Bul týraly facebook áleýmettik jelisinde gazettiń búginnen bastap burynǵy bas redaktory Rýslan Erbota habarlady. 

"Keıde men aqylǵa sımaıtyn táýekelge barǵyshpyn. Úsh jyl buryn qalamaqysy óte keremet, júregime jaqyn, Eýropanyń tórine baryp turýǵa mol múmkindik beretin qolymda turǵan jumysymdy tastap, Almatynyń qýyqtaı páterine kvartırant bop kóship keldim.

Gazettiń bas redaktory bolý maqsatym emes edi. Onyń ústine bas redaktor qyzmeti ne qarjylyq, ne materıaldyq paıda retinde kóringen emes.

Meniń álsizdigim aksıonerdiń «Rýslan, gazetti satý oıyma da kirgen emes, satsam baıaǵyda satar edim. Satpaımyn da. Ekinshiden, Altynbek aǵańnyń armandaǵan memleketi endi ornamas. Biraq, «Jas Alash» onyń kózindeı, lıstovkaǵa aınaldyrmaı, bir adamǵa qadalyp qalmaı, óıtkeni, erteń ol ketkende gazet birge ketedi, jalpyǵa ortaq, eshkimge búre tartpaıtyn naǵyz gazet jasasaq, keıin aǵańa, ana jaqqa barǵanymda júzim ashyq bolar edi» degen sózinen attap óte almadym.

Sonymen osy jyldary biraz qıyndyqty eńserdik, biraz jetistikke jettik. Muhtar Maǵaýınniń «Jas Alashqa» turaqty avtor bop kelýiniń ózi gazet isin túsinetin janǵa qanshalyqty mártebe ekeni aıtpasa da aıan.

Gazet tırajyn qulatpaı ustap turdyq, saıttyń kúndik oqylymyn on myńnan asyrdyq.

Gazettiń áleýmettik paraqshalaryndaǵy oqyrman qataryn robot jaldamaı, vırtýaldy aınalymǵa salmaı, tirideı kóbeıttik. Osynyń bárin sanaýly ǵana redaksııa qyzmetkerleri gazet bıýdjetine salmaq túsirmeı atqaryp shyqty. Ujymdaǵy áriptesterimniń osyndaı eren eńbekterine alǵysym sheksiz.

Qıyn qystaý kezinde isimizge dem berip, qoldap qoshtaǵan oqyrmandarymyzǵa myń da bir raqmet aıtqym keledi. «Dáýir» baspahanasynda basylyp jatqan gazetti aqordadaǵylar talaı márte toqtatyp tastaǵanda, tańǵa deıin daýlasyp aıqasqan shaǵymyzda biz artymyzda turǵan qymbatty ári qadirli oqyrmanymyzǵa ǵana sendik. Sol senim bizdi talaı synaqtan súrindirmedi.

О́mirlik muratym degen jolda aǵaıyn-týys, dos-jaranmen de qarym-qatynasymdy úzip aldym, qaıtemin, bul da bir ómir synaǵy shyǵar.

Gazettiń endigi baǵyty, taǵdyry qalaı bolaryn, jańa redaktory «Jas Alashtyń» dástúrin saqtar-saqtamasyn, lıstovkaǵa aınalar-aınalmasyn nemese bir partııanyń qol shoqpary bolar-bolmasyn jáne de basqalaryn endi aksıoner biledi.

Gazettiń endigi bas redaktory Inga Imanbaı" delingen jazbada.