Kanadada qazaqstandyq stýdenttiń jerleý rásimi ótti (vıdeo)

Qaıtys bolǵan qazaqstandyq stýdent Kanadada jerlendi dep jazady Qamshy.kz aqparat agenttigi CTV News saıtynyń deregin negizge alyp. Centennial koledji Damır Qusaın atyndaǵy stıpendııa taǵaıyndady.

Stýdenttiń anasy men týystary, kolledj ákimshiligi marqummen qoshtasyp, 4 qańtarda jerleý rásimin ótkizdi. Marqumnyń anasy Damırdiń mýzykany jaqsy kórgenin, aǵylshyn tilinde óleń jazǵanyn jáne Kanada azamaty bolýdy armandaǵanyn aıtty. 

"Ol Kanadada oqımyn degen bala kezdegi armanyn oryndady. Men uzaq ýaqyt boıy sengim kelmedi. Maǵan qatelesin habarlasqan shyǵar dep oıladym, solaı bolǵanyn qaladym. Ulymnan aıyrylǵanym týraly oılaǵym da kelmedi. Kelesi kúni meni 31 jeltoqsanǵa deıin aýrýhanaǵa jatqyzdy. Sebebi ulymnyń qaıtys bolǵanyn estigende stressten orynymnan qozǵala almaı qaldym", - dedi jerleý rásiminde Damırdiń anasy. 

Keıin anasy Damırdi ózi armandaǵan elge jerlegendi jón dep sheshken. 

Centennial Place jataqhanasynyń dırektory Metıý Flemıng Damır Qusaınnyń túrli is-sharalarǵa belsendi qatysqan stýdent retinde tanıtynyn aıtty. 

"Ol óziniń aınalasyndaǵy adamdarǵa "jan dúnıeń kórkem" dep aıtatyny esimde. Biraq shyn máninde eń meırimdi júrektiń ıesi Damır bolatyn. Onyń jan dúnıesi taza edi. Ol janashyr, júregi názik ári uqypty stýdent bolatyn. Damır bárine birdeı adal, janashyr dos bola bildi. Men ony saǵynatyn bolamyn", - dedi Metıý Flemıng. 

Sondaı-aq ol robototehnıkada oqıtyn, eń joǵary ortasha ball alǵan stýdentke 500 dollar kólemindegi Damır Qusaın atyndaǵy stıpendııa taǵaıyndalatynyn aıtty. 

Eske salsaq, 22 jeltoqsanda keshkisin Kanadada kólik júrgizýshi Torontodan Skarboro aımaǵynda Qazaqstan stýdentin qaǵyp ketti.