04 Qańtar, 2020 Aıtty-eı, baýyryń!

"Nazarbaev aldymyzǵa kelip, naqty suraqtarymyzǵa jaýap beretin"

Azattyq.org

Kórnekti memleket qaıratkeri, halyqtyń naǵyz jaqtaýshysy, qaısar oppozısıoner, oıshyl ǵalym, aty ańyzǵa aınalǵan qazaqtyń birtýar uly Serikbolsyn Ábdildın ómirden ozdy. Elimizdiń túpkir-túpkirinen, alys shetelderden marqumnyń artynan kóńilderin myńdaǵan qarapaıym adamdar, belgili tulǵalar qaıǵyǵa ortaq ekenderin bildirip, sińirgen eńbekterin atap jatyr.


Bul kisiniń halqyna istegen qyzmeti, memlekettigimizdi qalyptastyrýdaǵy sińirgen eńbegi, ásirese Táýelsizdigimizdiń zańnamalyq negizin qalaýdaǵy Joǵarǵy Keńestiń tóraǵasy retinde kórsetken erligi Qazaqstannyń jańa tarıhynda altyn áriptermen jazylatynyna esh kúmán joq. Sekeńniń danalyǵynyń arqasynda halyqtan saılanǵan, buqaranyń amanatyn jalaý etken ot aýyz, oraq tildi depýtattardy teke tireske jibermeı, daýyldarǵa aınalǵan pikirtalastarda, «tyǵyryqqa tirelgen» sátterde danalyq sózin aıtyp, jol taba bilgenine ózim de talaı kýá boldym.


Uly tulǵa, talantty saıasatker Ábdildınniń tóraǵalyǵynyń arqasynda qyzý talastar men qaıshylyqtar eńserilip, Táýelsizdik jarııalanyp, tunǵysh Konstıtýsııamyz qabyldanyp, memlekettik rámizder bekitildi. Serikbolsyn aǵamyz elimizdiń tarıhynda óshpes iz qaltyrdy.


Shynaıy balama arqyly Qazaqstan Parlamentiniń tóraǵasy bolyp jańa tarıhymyzda saılanǵan jalǵyz tulǵa – Serikbolsyn Ábdildın. Osylaı saılanǵanynyń arqasynda ol jer-jerlerden demokratııalyq jolmen 1990-shy jyly saılanǵan 360 depýtatty basqara bildi. Árqaısysynyń pikirimen sanasyp, prınsıpti qarym-qatynas quryp, kópshiliktiń kóńilin taba bildi de, jetekshilik etti. «Eki qoshqardyń basy bir qazanǵa syımaıdy» degendi eske alyp, Tuńǵysh Tóraǵa úlken saıası talanttyń ıesi ekenin moıyndaýymyz kerek.


Sekeń esime túsip, 1994-shi jyly saılanǵan Joǵarǵy Keńestiń 13-shi shaqyrylymynyń basshylarynyń dármensizdigine shydaı almaı, kómekshileriniń jazyp bergenderin ǵana oqyp otyrǵan «kósemderdi» oryndarynan ketýlerin talap ettim. Sebebi, Ábdildınniń belsendiligi men úshin úlken úlgi, demokratııalyq standartqa aınaldy.


Tóraǵanyń arqasynda depýtattyq qyzmetimizdiń kerektigin, el aldyndaǵy jaýapkershiligimizdi anyq sezinetin boldyq. Parlamenttiń bedeli taýdaı bolǵany da jetekshimizdiń arqasy dep sanaımyn. Jalpy otyrystarǵa, keıde, komıtet otyrystaryna Prezıdenttiń ózin kúrdeli máseleler boıynsha shaqyryp alatynbyz. Nazarbaev aldymyzǵa kelip, naqty suraqtarymyzǵa jaýap beretin. Qyzyp ketken keıbir áriptesterimiz Nazarbaevtyń ózin synap, usynǵan adamdaryn ótkizbeı qoıǵan jerlerimiz de bolǵan. Buny da qatardaǵy jaǵdaı dep barlyǵymyz qabyldaıtynbyz.


Sekeńniń taǵy bir qasıeti – adamgershiligi, qarapaıymdylyǵy. Ol kisi eshqashan shalqaımady, shirenbedi. Tóraǵa bolyp júrip, qatardaǵy depýtattarmen ózin teń ustady. Shydamdylyǵy tańqalarlyq. Keıde, «dereý sóz bere qoımadyńyz» dep qatty synǵa alatynbyz. Artyq aıtyp qoıǵan jerlerimiz de boldy. О́zim de til tıgizgenim bar. Ol kisi bolsa, bir de bir ret renishin kórsetip, kek saqtaǵan emes. Bul uly tulǵaǵa tán qasıet.


Ábdildın taǵy bir standart kórsetip ketti. Joǵaryda júrgen «kósemder» jıi-jıi úlken saıasattyń kir, las ekendigin, ózderiniń amalsyzdan sol ortada júrgendigin tilge tıek etetindigi bar. Kóptegen basshylarymyzdyń artynan ergen sybaılas jemqorlyqqa baılanysty janjaldardyń kýásimiz. Al, Sekeńniń artynan bir jaman sóz ermedi. О́zi bet júzine qaramaı basshylardy qatty synǵa alyp júrdi. Shetelge qashyp baryp emes, betterine basyp turyp bar shyndyǵyn aıtatyn. Bul tazalyqtan, adaldyqtan týǵan erlik barshaǵa úlgi bolarlyq.


Áli Sekeń týraly aıtar sózimiz alda...

Búgin marqumnyń janbasy jerge tıdi. Serikbolsyn aǵamyz máńgi júregimizde degim keledi. Jany janatta, topyraǵy torqa bolsyn!

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir