"Qysymǵa qaramastan mınıstrlik oǵan jol bermedi". Vıse-premer Bek Air-diń tórt jyl burynǵy talaby týraly aıtty

Búgin, 30 jeltoqsanda Úkimet otyrysynan keıin BAQ ókilderine suhbatyn bergen Qazaqstan premer-mınıstriniń orynbasary Roman Sklıar Bek Air áýe kompanııasynyń halyqaralyq ushýlarǵa sertıfıkat alý úshin memlekettik organdarǵa qysym jasaýǵa tyrysqanyn aıtty. 

– Bek Air osy jyldar ishinde lobbısterdiń qatysýymen túrli deńgeıde halyqaralyq áýe reısterin oryndaý úshin IOSA (Operational Safety Audit IATA - avıatasymaldaýshylardyń halyqaralyq assosııasııasynyń qaýipsizdik jónindegi aýdıti sertıfıkaty – red.) sertıfıkatyn alyp tastaýǵa tyrysty. Biraq mundaı qysymǵa qaramastan mınıstrlik oǵan jol bermedi, – dedi Sklıar.

Sklıardyń sózinshe, sol kezde halyqaralyq tasymaldy júzege asyratyn barlyq qazaqstandyq kompanııa IOSA sertıfıkatyn alǵan.

– Ishki tasymalǵa da onyń (IOSA – red.)  talaptary qajet bolatyn. Alaıda, ózderińiz de bilesizder, 2016 jyly BAQ-ta úlken naýqan bolyp, keıbir jýrnalıster men depýtattar kompanııany (Bek Air – red.) qoldap shyqty. Múmkin olardiki de durys shyǵar. Ishki baǵdarlardyń qosymsha talaptarǵa saı bolýy kerek te emes shyǵar. Sol kezde ókiletti memlekettik organ – Indýstrııa mınıstrligi Azamattyq avıasııa komıteti «IOSA talaptary ishki de, syrtqy da tasymalǵa qajet» delingen qaýly shyǵardy. Bul jerde belgili bir qaıta saqtandyrý elementteri, ıaǵnı, qosymsha talaptar bar edi. Degenmen, Tabıǵı monopolııalardy retteý jáne básekelestikti qorǵaý komıteti "bul – kásipkerlerdiń quqyǵyn buzý" degen uıǵarym shyǵaryp, mınıstrlik ishki reıster úshin bul talapty alyp tastaǵan edi, – dep túsindirdi Roman Sklıar.

2016 jyly qańtarynda  Bek Air áýe kompanııasy men Qazaqstannyń azamattyq avıasııa komıtetiniń arasynda daý bolǵan edi.  Daý azamattyq avıasııa komıtetiniń Bek Air áýe kompanııasynan IOSA sertıfıkatyn alýdy talap etýinen bastalǵan. Komıtet 2015 jyldyń aıaǵynda  "qańtardyń 1-inen bastap barlyq kompanııanyń sertıfıkaty bolýy tıis" dep málimdegen. Keıin Bek Air úndeý jarııalap, IOSA sertıfıkatyn alýǵa 1 mıllıon 500 myń dollardaı qarjy ketetinin, ol bılet qunyna áser etetinin aıtyp, ózderin keıingi jyldary bılet qunyn arzandatyp, jolaýshy sanyn kúrt kóbeıtken kompanııa dep sıpattaǵan edi.

Buǵan qosa, Bek Air "Ushaqtarymyzdyń ushý qaýipsizdigi kompanııa iske kiriskeli, ıaǵnı 2011 jyldan beri 100 paıyzdan tómendemegen, kerisinshe IOSA sertıfıkatyn alǵan kompanııalardyń qaýipsizdik deńgeıi tómendeý" dep málimdegen bolatyn. Sol kezde kompanııanyń osy ýájin birqatar depýtattar men qoǵamdyq uıymdar qoldaǵan. Olardyń arasynda "Atameken" ulttyq kásipkerler palatasy bar edi. 

27 jeltoqsan kúni tańerteń Almaty áýejaıy mańyna Bek Air áýe kompanııasynyń Fokker-100 ushaǵy qulady. Almaty áýejaıy baspasóz qyzmetiniń habarlaýynsha, ushaqta 93 jolaýshy men bes ekıpaj múshesi bolǵan. Resmı oryndardyń deregin negizge alǵan birqatar BAQ bastapqyda 15 adamnyń qaza tapqanyn habarlaǵan edi. Keıinirek premer-mınıstrdiń orynbasary Roman Sklıar ushaq apatynan 12 adamnyń qaza bolǵanyn málimdedi. Olardyń arasynda ekıpaj komandıri Marat Muratov ta bar. Osy apatqa baılanysty Qazaqstan prezıdenti Qasym-Jomart Toqaev  28 jeltoqsandy jalpyulttyq aza tutý kúni dep jarııalaǵan.