Medısınalyq saqtandyrý qory áıelder túrmesinde tárbıelenip jatqan balalardy quttyqtady

Jańa jyl qarsańynda medısınalyq saqtandyrý qorynyń Almaty fılıalynyń qyzmetkerleri LA-155/4 áıelder kolonııasynda tárbıelenip jatqan búldirshinderdi quttyqtady.

Jaýǵashty aýylyndaǵy kolonııa – sábıler úıi bar birden-bir túzeý mekemesi. Sondyqtan taǵdyr tálkegine túsip, isti bolǵan, emizýli nemese kishkentaı balasy bar áıelder osynda jóneltiledi. Túrme basshylyǵynyń aıtýynsha, sot júıesiniń izgilendirilýine baılanysty sońǵy jyldary olardyń kóbi bostandyqqa ýaqytynan buryn shyǵýǵa múmkindik alyp otyr.

Búgingi kúni túrme janyndaǵy sábıler úıinde 3 jasqa deıingi 19 bala tárbıelenip jatyr. Analarǵa ýaqytynyń basym bóligin balanyń qasynda ótkizýge ruqsat etilgen.

Jańa jyl qarsańynda Medısınalyq saqtandyrý qorynyń Almaty fılıaly qyzmetkerleri balalarǵa umytylmas mereke syılady.

Balalar da, analar da Aıaz Atamen jáne Qarsha qyzben kezdesýge tyńǵylyqty daıyndalypty. Sheber áıelder búldirshinderge jańa jyldyq kostıýmder tikse, balalar qonaqtarǵa jańa jyldyq taqpaqtaryn aıtyp berdi. Qor ókilderi ákelgen oıynshyqtar, tátti syılyqtardyń balalarǵa tamasha kóńil-kúı syılaǵany daýsyz.

Fılıal dırektorynyń orynbasary Janar Kenjebaevanyń sózine súıensek, qaıyrymdylyq sharalarynyń kolonııada tárbıelenip jatqan balalar úshin mańyzy zor.

– Mundaı aksııalar túrmede turatyn balalardyń psıhıkalyq kóńil-kúıine, emosıonaldyq jaǵdaıyna oń yqpal etedi. Sol sebepti osyndaı sharalardy múmkindiginshe kóbirek ótkizilýi qajet. Biz kishkentaı búldirshinderge kishigirim bolsa da mereke syılaǵanymyzǵa qýanyshtymyz. О́ıtkeni jańa jyldy balalar erekshe kútedi emes pe?! – dedi Janar Kenjebaeva.