"Betinen atqan": Taldyqorǵandaǵy maıorǵa qatysty tyń derek shyqty

Almaty oblysynda 36 jastaǵy maıordy úıiniń aldynda basynan atyp ketti dep jazady Qamshy.kz aqparat agenttigi KTK arnasynyń deregin negizge alyp. 

Almaty oblysynda áskerı bólimshe basshysynyń orynbasaryn atyp ketti. 36 jastaǵy maıordyń denesi ózi turatyn úıdiń aldynan tabylǵan. Rústem Janyqbaev Taldyqorǵandaǵy №48386 áskerı bólimshede qyzmet etken. Sondyqtan marqumnyń ákesi bul qastandyq onyń qyzmetine tikeleı qatysty bolýy múmkin deıdi. Alaıda maıordy mert qylǵandardyń kim ekeni ázirge belgisiz. Tártip saqshylary áskerıge oq atqandardy izdeýge kiristi.

Rústem Janyqbaevtyń óli denesi ózi turatyn úıdiń aldynan keshe keshqurym tabylǵan. Taldyqorǵandaǵy Qaratal yqshamaýdanyndaǵy aýlada jatqan marqumdy kýágerler kórip, jedel-járdem shaqyrtqan eken. Alaıda dárigerler kelgenshe 36 jastaǵy maıor jan tapsyrǵan. Ony belgisiz bireýler ańshy myltyǵymen basynan atypty.  

"Balamdy artynan kelip atyp ketipti. Jelkesine qarý taqap kelip, «Rústem» degende jalt qaraǵan. Sol sátte betinen atqan. Ne úshin óltirdi? Bilmeımin. Kimge jamanshylyq jasady? Qara jamylǵan otbasy marqumnyń eshkimge «jamanshylyǵy joq edi", deıdi marqumnyń ákesi Seıithan Janyqbaev.

Ásirese qaıǵydan qan jutqan ákesi ulynyń tik minezdi bolǵanyn, biraq jan balasymen jaýlaspaǵanyn aıtady. Dese de bul qastandyqtyń qyzmetine tikeleı qatysy bolýy múmkin ekenin joqqa shyǵarmaıdy. Al polıseıler kesheli beri kúdiktilerdi izdestirip jatyr. Jaqyn mańdaǵy beınekameralar tekserilip, qandy qylmysty kórgen kýágerler izdestirilýde. Alaıda ázirge eshqandaı ilik joq.   

"Atalǵan derekke qatysty jedel izdestirý toby quryldy. Toptyń quramyna tájirıbeli mamandar jumyldyryldy. Qazir qylmysqa qatysy bar tulǵalardy anyqtaýǵa baǵyttalǵan keńaýqymdy izdestirý jumystary júrgizilip jatyr", - dedi Almaty oblystyq PD resmı ókili Serik Úrpıev. 

Qaskóılerdiń qolynan qaza tapqan maıordyń artynda eki balasy qaldy. Al ózi qyzmet etken áskerı bólim basshylary bul jaǵdaıǵa qatysty qandaı da bir pikir bildirýge qulyqsyz. Elimizdiń Qorǵanys mınıstrligi de tergeý qupııalylyǵyna baılanysty boljam aıtýdan bas tartyp otyr. Al oblystyq polısııa departamenti adam óltirý baby boıynsha qylmystyq is qozǵap, áskerı bólim qyzmetkeriniń ólimin Ishki ister mınıstri óz baqylaýyna aldy.