25 Jeltoqsan, 2019 NEWS

Saǵyntaev: LRT qurylysyna úkimetten qomaqty qarjy surap otyrmyz

Fotokollaj: Qamshy.kz

Búgin, 25 jeltoqsanda Bostandyq aýdanynyń turǵyndarymen kezdesken Almaty qalasynyń ákimi Baqytjan Saǵyntaev qaladaǵy Tımırzev kóshesindegi VRT jelisi qala beretinin, aldaǵy ýaqytta LRT (jeńil temirjol - red.) salý úshin úkimetten qomaqty qarjy suraǵanyn aıtty. 

Saǵyntaevtyń aıtýynsha, Tımırıazev kóshesindegi BRT jelisin uzartý josparda bar, al LRT qurylysy týraly másele qarastyrylyp jatyr.

- Bizge Tımırıazev kóshesindegi BRT týraly kóp aıtady. Men óz ustanymymdy aıta keteıin - BRT jelisi qalady. Jaqyn kúnderi biz LRT qurylysy týraly máseleni qarastyramyz. Qazir Úkimetten qurylysqa qomaqty qarajat surap otyrmyz. Bul jobany memlekettiń qoldaýymen ǵana júzege asyrýǵa bolady. Sebebi mundaı úlken qurylysqa jergilikti bıýdjettiń shamasy kelmeıdi. Tımırıazev kóshesi boıyndaǵy BRT jelisin uzartý josparda bar, - dedi Saǵyntaev.

Almatydaǵy Tımırıazev kóshesiniń joly 2018 jyldyń 1 qyrkúıeginen bastap BRT jelisine aýystyrylǵan.  Bul - Qazaqstandaǵy BRT jelisiniń alǵashqysy bolǵan edi. Dál osy Tımırıazev kóshesiniń BRT jelisine aýystyrylǵanyn qala turǵyndarynyń kóbisi  "jol qozǵalysyn tejedi" dep quptamaı, sol kezdegi Almaty ákimi Baýyrjan Baıbekti synaǵan.

Al LRT, ıaǵnı, jeńil temirjol  Almaty qalasynda joq. 2016 jyly Astanada (qazirgi Nur-Sultan) Qazaqstandaǵy alǵashqy LRT-nyń qurylysy bastalǵan. Bastapqy jospar boıynsha qurylys jumystary 2019 jyly 31 jeltoqsanda aıaqtalyp, 2020 jyly jazda paıdalanýǵa berilýi tıis edi. 22 kılometrden asatyn joldy salýǵa 1 mıllıard 887 mıllıon dollar bólingen. Biraq keıin qurylys jumystary toqtap qalǵan. 15 shildede Qazaqstan prezıdenti Qasym-Jomart Toqaev LRT qurylysy durys josparlanbaǵanyn, joba tym qymbatqa jasalǵanyn synaǵan.

 

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir