Jańa ortalyq tarıhymyzdy tereń tanyp, rýhanııatty ósirýge úles qosady

Jambyl oblysynyń 80 jyldyq mereıtoıyna oraı ashylǵan «Kóne Taraz» tarıhı-etnomádenı kesheninde el ıgiligine berilgen nysandardyń biri – «Rýhanııat jáne tarıhtaný» ortalyǵy.

Halyq jazýshysy Sherhan Murtaza atyndaǵy atalǵan ortalyqta búginde óńirge qatysty rýhanı qundylyqtar, tarıhı tanymdar, salt-dástúr, joralǵylarymyzdyń bári kórinis tabýda. Aldaǵy ýaqytta onda jergilikti aıtyskerler men jazba aqyndardy, qalamgerlerdi  qoldaý is-sharalaryn turaqty túrde uıymdastyryp  otyrý jolǵa qoıylmaq. Aty aıtyp turǵandaı,  ortalyqta óńirdiń rýhanııaty men tarıhyn tanytýǵa, nasıhattaýǵa qatysty júıeli  jumystar qolǵa alynyp, túrli taqyryptaǵy qundylyqtar kórsetiledi dep kózdelýde.

Rýhanııat jáne tarıhtaný ortalyǵy — tarıhymyzdy tereńnen tanyp bilýge, ónerimiz ben mádenıetimizdi, ádebıetimiz ben salt-dástúrimizdi jańǵyrtar, rýhymyzdyń ózegi bolar birden-bir mekeme.

Ortalyqqa Sherhan Murtazanyń atyn berý usynylyp, Respýblıkalyq onomastıkalyq komıssııadan qoldaý tapty. Qazir Úkimet qaýlysynyń jobasy daıyndalýda. Sondyqtan da shyǵystyq sáýlet úlgisinde salynǵan ǵımarattyń kireberisinde  taý tulǵanyń gorelef músini ornatyldy.

Eki qabattan turatyn ǵımarattyń birinshi qabatynda úlken jáne kishi májilis zaldary bar. Munda zııaly qaýym ókilderi men buqaralyq aqparat quraldary, qoǵam belsendileri, oblys turǵyndary men qonaqtary rýhanı sharalardy ótkizip, bas qosatyn bolady. Sondaı-aq birinshi qabatta amfıteatrda óz ónerin halyq nazaryna usynatyn ónerpazdardyń grım bólmeleri de bar.

Ortalyqtyń ekinshi qabatynda úlken holda Sherhan Murtazanyń ádebıeti men jýrnalıstıkasyna arnalǵan qos qanat beınesindegi qoljazbalary men sýretterinen turatyn kompozısııa jasalǵan.  Kompozısııanyń astynda Sheraǵa otyrǵan eki kreslo men jýrnal stoly qoıyldy.

Holdyń eki jaq qabyrǵalaryndaǵy kórme sórelerinde jazýshynyń kózi tirisinde oblystyq kitaphanaǵa syıǵa bergen zattary el nazaryna usynylyp otyr. Onda Sher-aǵa paıdalanǵan qolmen jazý mashınkasy, sývenırlik qalamy, ıissý qutysy, kilemshesi, shapany, mantııasy, portfeli, tipti jeke “Kıev” fotoapparaty, Sheraǵanyń marapattary, kýálikteri jáne ózge de jeke basyna qatysty qujattary qoıyldy.

Ortalyq eki bólimnen turady. Olar: Tarıhtaný jáne Sherhantaný.

Tarıhtaný bólimi  negizinen Jambyl oblysy óńirindegi ejelgi dáýirden qazirgi kúnge deıingi ótken tarıhymyzdy zerttep, zerdelep, arhıv qujattary jáne tarıhı jazba derek kózderi arqyly naqty faktilerdi jınaqtaıdy. Sherhantaný bólimi – keleshekte ulttyq rýhty kóterer mádenı murany, ádebıetti, tarıhty,  etnografııany, ańyz-áńgimelerdi, jyr-dastandardy jáne aqyn-jyraýlardyń eńbekterin júıeli túrde zerdelep, aqyn, jazýshy, aıtysker, sazger, tarıhshy jáne ólketanýshylardyń eńbekterinen altyn qor qalyptastyrýdy qolǵa alady. Bul bólimde salt-dástúr, halyq aýyz ádebıeti jáne ádebı shyǵarmalar, dástúrli mýzyka, sherhantaný shyǵarmashylyq zertteý bólmeleri biriktirilgen. Onda Sh.Murtazanyń muralary týraly aqparattar toptastyrylyp, broshıýra daıyndaýda josparda bar.

Mekeme qyzmetkerleri jergilikti aqyn, jazýshy, kompozıtor, sýretshiler týraly anyqtamalyq  málimetter daıyndap, jumys barysynda paıdalanýǵa usynyp otyrady.  Jyl boıy atqaratyn is-sharalarǵa ádistemelik quraldar, baspa ónimderin daıyndap, beınerolıkter ázirleý de negizgi baǵyttardyń birine aınalmaq.

 Qurylysty bas merdiger «KDSM» jaýapkershiligi shekteýli seriktestigi júrgizgen.   Qurylystyń jalpy alańy 2335,14 sharshy metrdi quraıdy.