Talǵat Esenalıev «Úzdik teatr menedjer» atandy!

Qazaqstan Respýblıkasynyń Mádenıet jáne sport mınıstrligi Qazaqstan teatrlar assosıasııasynyń uıymdastyrýymen ótetin «Sahnager» Ulttyq teatr syılyǵy – elimizdiń mádenı keńistigin biriktirip qana qoımaı, memleketimizdiń kópultty teatr óneriniń damýyna tirek bolatyn kórkemdik-estetıkalyq jáne rýhanı qundylyqtardy nasıhattap, búgingi teatr óneri úrdisindegi jańashyldyq pen sahnalyq izdenisterdi kópshilikke dáriptep, óskeleń urpaqtyń boıynda otansúıgishtik qasıetter men eldik sezimderdi arttyrýǵa jol ashyp, respýblıkalyq jáne aımaqtyq teatrlardyń shyǵarmashylyq kelbetin saqtaý men damytýdaǵy rólin aıqyndap, damytýǵa múmkindik týǵyzyp otyrǵan birden-bir aıtýly shara.

Ulttyq teatr syılyǵy elimizde bıyl úshinshi ret óz ıegerlerin taýyp, laýreattardyń shyǵarmashylyq jetistikteri respýblıkalyq deńgeıde marapattaldy. Olardyń qatarynda drama, opera, balet, qýyrshaq, jastar teatrlarynda eńbek etip júrgen, aıyryqsha daryny men shyǵarmashylyǵy arqyly el óneriniń damýyna erekshe úles qosqan kásibı mamandar bar.

Sondaı-aq premııa-festıval aıasynda bıylǵy «Jastar jyly» sheńberinde memleketimizdegi daryndy jas artısterdi qoldaýǵa erekshe nazar aýdaryldy.

Aıtýly teatr báıgesinde Qazaqstannyń mádenıet qaıratkeri, Almaty qalasynyń Memlekettik qýyrshaq teatrynyń dırektory ESENALIEV TALǴAT QAMQABAIULY respýblıkadaǵy teatrlar arasynan «Úzdik teatr menedjeri» júldesine ıe boldy.

Talǵat Esenalıev teatr basshysy retinde irgeli isterimen qosa, qazaq teatr óneri salasynda 20 jyldan asa qarymdy eńbek sińirip keledi. Atap aıtqanda, M.Áýezov atyndaǵy Qazaq memlekettik akademııalyq drama teatrynda eńbek jolyn bastap, teatr menedjmenti salasynda sapaly qyzmet, aýqymdy is-sharalardy abyroımen ótkizdi. Ǵ.Músirepov atyndaǵy Akademııalyq Balalar men jasóspirimder teatrynda dırektordyń orynbasary qyzmetin de kásibı joǵary deńgeıde atqaryp, mádenıet salasynyń órkendeýine óz úlesin qosty.

Búginde qýyrshaq teatrynyń qazaq teatr óneri keńistigindegi bedelin qalyptastyryp, respýblıkalyq, halyqaralyq deńgeıde óner kórsetýine barlyq jaǵdaıdy qarastyrýda. Bıik belesterdi baǵyndyrǵan ujymynyń alǵa qoıǵan baǵyty men baǵdary da aıqyn. Ol – qazaqtyń qýyrshaq teatry ónerin órkendetý,  keshegi men búgingi ómir arasyn ónerdiń bıik shyńy arqyly shynaıy kórsete bilý. Ulttyń rýhanı qajettiligin ótep otyrǵan teatrdyń repertýarlyq saıasatynyń aýqymy da keń. Repertýardaǵy otyzdan astam qoıylymdar orys jáne qazaq tilderinde kórermen nazaryna usynylyp otyr.

2019 jyldyń ózinde jeti teatr festıvalinde úzdik óner kórsetip, júldeli oralǵan teatrdyń kórkemdik deńgeıi men shyǵarmashylyq ujymǵa qajetti jaǵdaıdy qarastyryp otyrǵan Talǵat Qamqabaıulynyń bilikti basshylyǵy barsha jas mamandarǵa úlgi. Ustazdyq jolda da eńbek etip, jastarǵa baǵyt berip qoldaýda ólsheýsiz eńbektenip kele jatqan isker basshy, ónerge janashyr azamatty laıyqty marapatymen barsha áriptesteri quttyqtaıdy.