• USD 389.52
  • EUR 429.21
  • RUB 6.07
  • CNY 54.94
30 Qańtar, 04:15:35
Qazaqstan Ýkraınanyń saýda naryǵyna alańdaýly

24 Jeltoqsan, 2019 NEWS

Qytaılyqtardy soqqyǵa jyqqan bes azamatqa qatysty sot otyrysy bes mınýtqa jetpeı toqtatyldy

qamshy.kz

Búgin Almaty oblysy Aqsý aýdandyq sotynda qytaı eliniń jumysshylaryn soqqyǵa jyqty dep aıyptalǵan Qyzylaǵashtyń bes turǵynyna qatysty kezekti sot otyrysy taǵy da keıinge qaldyryldy, dep jazady sot otyrysyna qatysqan Qamshy.kz aqparat agenttiginiń tilshisi.

Qyzylaǵashtyń 5 turǵyny sot bastalmas buryn ádildik izdeıtinderin aıtty. Alaıda sot otyrysy taǵy da shegerildi. О́ıtkeni otyrysqa jábirlenýshi tarap  – qytaılyq jumysshylar kelmedi. Jábirlenýshilerdiń tarapynan tek avtobýs ıesi men polısııa qyzmetkeri keldi.

Qamalǵan jigitterdi qoldaýǵa kelgen jýrnalıst Rysbek Sársenbaıdyń aıtýynsha, aryz túsirýshilerdi sot otyrysyna kelmeýi – zańdy syılamaıtyndarynyń kórinisi.

Olar kelýi kerek edi. Olardyń kompanııasynyń ortalyǵy jaqyn mańda ornalasqan. Jol taıǵaq bolsa da qanshama adam kelip, sotqa qatysyp otyr. Olar ne jete almady ma? Bul –  zańdy syılamaıtyndarynyń kórinisi, –  dep narazylyǵyn bildirdi.

Al advokat Janar Balǵabaeva "sheteldiktermen tóbelesti" dep aıyptalǵan Qyzylaǵashtyń bes azamaty prokýrormen prosessýaldyq kelisim jasasqany týraly aıtty.

Osylaısha, keshigip bastaǵanymen qoımaı aınalasy bes mınýtqa jetpeı toqtatylǵan sot otyrysynan soń shamamen 500-ge jýyq adam óz narazylyqtaryn bildirdi. Áýeli "Bostandyq!" dep urandap, artynsha seńdeı qozǵalyp, bes jigitti áketýge daıyn turǵan kóliktiń jolyn bógedi. 

Qara nópir halyq narazylyǵyn taratý úshin "kaska" kıip, qalqan ustaǵan arnaıy jasaq kelse de ashynǵan jurt raıynan qaıtpady. Olardyń talaby – sot prosesin sozbaı, bes jigitti bostandyqqa shyǵarý.

Osy rette, Qoǵam qaıratkeri Rysbek Sársenbaı polıseılerdiń kóliginiń ústine shyǵyp, halyqty sabyrǵa shaqyrdy: 

– Baýyrlarym, sál sabyr etińizder! Aqyl kerek. Biz halyqpyz, osynsha adam jınalyp turǵanyna biz rızamyz. El bar, qazaq degen halyq bar eldiń namysyn qorǵaıtyn. Bes batyr bolsa, bes batyrdyń artynda bes myń, bes júz myń, bes mıllıon halyq bar. Bıliktiń kózin jetkizdik biz. Qazir sál sabyr etińizder. Zań bar, tártip bar. Tártipke baǵynýymyz kerek. Men sizderdiń attaryńyzdan talap qoıdym. Sot prosessin sozbasyn. Sýdıa erteńge qaldyryp otyr, soǵan kelispeı otyrmyz. Solaı ǵoı? Sondyqtan, bizdiń talabymyz, sot prosessin qaıta bastasyn. Qazir biz qaıtadan ótinish jasaımyz. Jigitterdi erkindikke kepil arqyly, ne bolmasa qolhat arqyly, ne bolmasa úıqamaq arqyly bostandyqqa shyǵarýyn talap etemiz. Jábirlenýshilerdi keltirsin. Sot prosesin qysqartsyn, – dedi Rysbek Sársenbaı.

Budan soń aýdandyq prokýrordyń orynbasary Ádilet Asqaruly sóz alyp:

– Jerlester, barlyqtaryńyz bilesizder. Jańa estidińizder, sot prosesin erteńge qaldyrýǵa kelisildi. Ýaqyt kerek. Erteń úshtegi sot prosesinnen soń jigitter sot zalynan bosatylady. Sondyqtan, Rysbek aǵa aıtqandaı, zańǵa baǵynaıyq, qoǵamdyq tártipti buzbaıyq. Shydamdylyq tanytaıyq, kelistik pe? Bizdi de túsinińizder. Erteń saǵat úshte prosestik kelisim bekitilgennen keıin jigitter sot zalynan bosatylady, – dedi.

Eske sala ketsek, bıyl 8 qazanda Almaty oblysy Aqsý aýdany Qyzylaǵash aýylynyń turǵyndary qytaı azamattaryn soqqyǵa jyqqany týraly habarlanǵan bolatyn. Oǵan sebep, "Citic Construction" kompanııasynda jumys isteıtin qazaq-qytaı jumysshylary arasyndaǵy qaqtyǵys-tyn. Qytaılyq jumysshylardyń aryzy boıynsha Qyzylaǵash aýylynyń turǵyndary Berikbol Rysaldınov, aǵaıyndy Beıbit jáne Nurbol Muhmetalın, Erkin men Sarqyt Salhanovtar ustalǵan. Olar qasaqana dene jaraqatyn keltirgeni úshin aıyptalýda.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir