Jambylda oblystyq «Kitap oqyp, rýhanı baı bol!» baıqaýy ótti

Kıeli Áýlıeata óńirinde aımaqtyq «Kitap oqyp, rýhanı baı bol!» baıqaýy óz máresine jetti. Qazan aıynda bastaý alǵan baıqaýda óńirdiń barlyq aýdandary men Taraz qalasynan 55 qatysýshy baq synady. Bul bilim básekesi Qazaqstan Respýblıkasynyń Aqparat jáne qoǵamdyq damý mınıstrliginiń bastaýymen elimizdiń barlyq oblystarynda ótýde. Aıta ketý kerek, atalmysh baıqaý tuńǵysh ret 2018 jyly Jambyl oblysynda belgili jýrnalıst, Taraz qalalyq «Jambyl-Taraz» saıası-qoǵamdyq gazetiniń dırektor-bas redaktory Elmıra Myrza-Ǵalıdyń bastamasymen qolǵa alynǵan edi.

Qoǵamda rýhanı silkinis týdyrǵan joba mınıstrlik tarapynan qoldaý alyp, basqa aımaqtarda da jalǵasyn tabýda. Kezekti kitap oqý jarysyn Jambyl oblysynyń «Rýhanı jańǵyrý» jobalyq ofısi men Sh.Ýálıhanov atyndaǵy oblystyq ámbebap ǵylymı kitaphanasy birlesip uıymdastyrdy.

Erejege sáıkes baıqaý 2 kezeńge, 2 kategorııaǵa bólingen. Baıqaý qatysýshylaryna arnaıy belgilengen 43 kitap usynyldy. 1-shi kezeńnen sátti ótken 22 qatysýshy aqtyq synda ózderi tańdap oqyǵan kitaptardan qoıylǵan suraqtarǵa jaýap berip, jeńimpazdar anyqtaldy. 15 jasqa deıingi qatysýshylar arasynan III oryndy Jambyl aýdany, Birlesý-Eńbek orta mektebiniń 9 synyp oqýshysy Joldybaı Eldos, II oryndy Jambyl aýdany, Birlesý-Eńbek orta mektebiniń 7 synyp oqýshysy Jahan Saıda, I oryndy Taraz qalalyq №48 T.Rysqulov atyndaǵy orta mektebiniń 6 synyp oqýshysy Muhtar Amına ıelendi. Al, 15 jastan joǵarǵy qatysýshylar arasynda III oryndy Taraz qalasy, Jambyl polıtehnıkalyq joǵarǵy kolledjiniń 2 kýrs stýdenti Aqnur Bashırova, II oryndy Merki aýdany, №6 orta mektebiniń 10 synyp oqýshysy Dıana Jeksenbıeva, I oryndy Taraz qalalyq №54 orta mektebiniń 10 synyp oqýshysy Ásil Aıajan ıelendi.

Barlyq qatysýshylar men jetekshilerine alǵys hattar, jeńimpazdarǵa baǵaly syılyqtardy tabys etildi. Júldegerlerdi Jambyl oblystyq «Rýhanı jańǵyrý» jobalyq ofısiniń basshysy Zarına Qýatova marapattady. Jastar arasynda kitap oqý mádenıetin damytyp, úzdik kórkem ádebı shyǵarmalardy tanymal etý maqsatynda ótken shara aldyńǵy ýaqytta da jalǵasyn tabatyn bolady.