О́ndiris oshaǵynyń jumysyna serpin beredi

Táýelsizdik kúni qarsańynda Jambyl oblysy Qarataý qalasyndaǵy «Qazfosfat» JShS «Sholaqtaý» taý ken óńdeý kesheni zerthanasy qaıta jańǵyrtýdan ótip, paıdalanýǵa berildi.

El aýmaǵynda D.Mendeleev kestesiniń barlyq derlik elementteri bar. Onyń ishinde bizdiń óńirdiń de áleýeti joǵary. Al bizdiń óńirde hımııa salasynyń júregi sanalatyn «Qazfosfat» JShS elimizdegi birigeı óndiristik qurylym. Búginde onda 6000 qyzmetker jumys jasaıtyn seriktestik zaman talabyna qaraı jumys jasaýy tıis. Osyny eskergen seriktestiktiń bas dırektory Muqash Eskendirov «Sholaqtaý» taý ken óńdeý kesheniniń eski zerthanasyn zaman talabyna saı jabdyqtarmen qaıtadan jańǵyrtyp berdi. Osy jyldyń mamyr aıynda bastalǵan jumystar Táýelsizdik merekesi qarsańynda tolyqtaı aıaqtalǵan. Osylaısha, tehnıkalyq baqylaý jáne zertteý bólimderi ortalyqtandyrylyp, sońǵy talaptarǵa saı qural-jabdyqtarmen jabdyqtalypty. Atalǵan zerthananyń ashylý saltanatynda Muqash Eskendirov bul jerde kúndelikti jumystan bólek, zertteý jumystary júrgiziletinin atap ótti.

– Búginde seriktestikte 6 ken orny bar. Ol jerlerdiń hımııalyq quramdary ózgeshe. Ondaǵy jer qyrtysyn tolyqtaı zerttep, óndirý zaýyttary jiberý osy zerthananyń mindetine jatady. Mundaǵy qural-jabdyqtardyń barlyǵyn Reseı Federasııasynan arnaıy aldyrdyq. Ol úshin 300 mıllıon teńge bóldik. Sondaı-aq mamandardyń da bilimderin jetildirdik. Budan ózge osyndaǵy oqý oryndarynyń stýdentterimen jumys jasap, ınjenerlik salaǵa bet burýyna kúsh salýdamyz. О́ıtkeni, bolashaq jastardyń qolynda, – dedi Muqash Zulqarnaıuly.

Zerthananyń ashylý saltanady sóz alǵan Talas aýdanynyń ákimi Baqyt Qazanbasov sala mamandaryn zamanaýı ǵımarattyń ashylýymen quttyqtap, hımııa ónerkásibi salasyndaǵy jumystaryna sáttilik tiledi. Sondaı-aq aýdan ákimi birigeı óndiristik qurylym oblystyń áleýmettik salasynyń damýyna orasan úles qosyp kele jatqanyn tilge tıek etip, aldaǵy ýaqytta Qarataý qalasynyń damýyna da nazar salatynyna senim bildirdi.

Búginde 20-dan astam maman jumys atqararatyn zerthanada kendi suryptaý, elektro qalqany, prekýrsorlar men ýly zattar qoımasy, termııalyq bólme, munaı ónimderin taldaý jáne analıtıkalyq zertteý syndy birqatar bólimder jumys jasaıdy. Sonymen qatar onda jumysshylar úshin bar jaǵdaı jasalynǵan. Iаǵnı, jýyný bólmeleri men oqý bólmeleri qarastyrylǵan.