Aıtahanov Qytaı elshisimen kezdesip, Shymkentke ınvestorlar shaqyrdy

Búgin, 19 jeltoqsanda Shymkent qalasynyń ákimi Erlan Aıtahanov Qytaıdyń Qazaqstandaǵy elshisi Chjan Sıaomen kezdesti. Bul týraly Qazaqparat habarlady.

Qazaqparattyń jazýynsha, kezdesýde taraptar Qazaqstan men Qytaı arasyndaǵy tatý kórshilik qarym-qatynastardy odan ári nyǵaıtýdyń jáne ózara tıimdi yntymaqtastyqty damytýdyń mańyzdylyǵyn atap ótken. Aıtahanov Qytaı elshisin Shymkentke ınvestor tartýǵa shyqarǵan. 

– О́zińizge málim, Memleket basshysy Qasym-Jomart Toqaev Beıjińde ótken Qazaqstan-Qytaı iskerlik keńesiniń altynshy otyrysynyń ashylýynda Qytaı Qazaqstannyń eń iri syrtqy saýda jáne ekonomıkalyq áriptesteriniń biri ekendigin aıtqan bolatyn. Osy baǵyttaǵy jumystardy jandandyrý úshin óndirisi men ınfraqurylymy damyp kele jatqan megapolıske ınvestorlardy shaqyramyz. Sebebi Uly Jibek jolynyń boıynda ornalasqan iri tranzıttik dálizderi bar Shymkentte ınvestorlar úshin qolaıly jaǵdaı jasalǵan. Sondyqtan biz túrli baǵytta áriptestik ornatýǵa nıettimiz, – dedi Aıtahanov.                                                                                                                                                                                                                                              

О́z kezeginde elshi Chjan Sıao Qazaqstannyń eks-prezıdenti Nursultan Nazarbaevtyń "eki memlekettiń dostyq qarym-qatynasyn nyǵaıtýǵa qosqan zor úlesi men úlgili sara jolyn ári qaraı jalǵastyrý qajet" ekenin jetkizgen. Sondaı-aq Aıtahanovtyń ınvestorlarǵa qatysty aıtqan pikirmen kelisip, sol baǵytta jumystar atqarylatyndyǵyn aıtqan.

Qytaı – Qazaqstanǵa eń kóp ınvestısııa salǵan - tórtinshi, eń kóp qaryz berýshi úshinshi el. Qazaqstanǵa ınvestısııa salý boıynsha alǵashqy úshtikte Nıderland, AQSh jáne Shveısarııa tur. Ulttyq banktiń 2018 jylǵy esebinshe, Qazaqstannyń Qytaı aldyndaǵy qaryzy 12 mıllıard dollardy quraıdy. Qazaqstannnyń Gollandııaǵa – 49 mlrd dollar, Ulybrıtanııaǵa – 21,4 mln dollar, AQSh-qa 12,3 mlrd dollar qaryz.