Toqaev dopıngpen ustalǵan sportshylardy syıaqydan aıyrý týraly zańǵa qol qoıdy

Qazaqstan prezıdenti Qasym-Jomart Toqaev "QR Sport jáne dene shynyqtyrý týraly keıbir zańnamalyq aktilerge ózgertýler men tolyqtyrýlar engizý týraly» zań jobasyna qol qoıdy. Bul týraly sport komıtetiniń baspasóz qyzmeti habarlady. 

Zań jobasy dopıngke qarsy erejelerdi buzǵandardyń jaýapkershiligin qatańdatýǵa, Ulttyq dopıngke qarsy uıymnyń mártebesin kúsheıtýge baǵyttalǵan.

"Qoldanystaǵy zańnamaǵa dopıngke qarsy erejelerdi buzǵany úshin jaýapkershilikti qatańdatý boıynsha ózgerister men tolyqtyrýlar engizý, atap aıtqanda sportshyǵa dopıng taǵaıyndaǵan adamdarǵa qatysty ákimshilik jaýapkershilikti engizý qajettiligi týyndady. Ol 200 aılyq eseptik kórsetkish mólsherinde aıyppul túrinde jazany kózdeıdi" - delingen komıtettiń habarlamasynda.

Zań jobasynda dopıngti paıdalanǵan sportshyǵa dıskvalıfıkasııa, sportshynyń sporttaǵy nátıjesin joıý jáne biliktilik upaılaryn nemese baldaryn alyp tastaý, aqshalaı kótermeleýdi qaıtarý, sportshylar men jattyqtyrýshylarǵa ómir boıy aı saıynǵy materıaldyq qamsyzdandyrýdy tóleýdi toqtatý, sportshylarǵa, jattyqtyrýshylarǵa jáne klýb komandalarynyń basshylaryna aı saıynǵy aqshalaı qamtýdy toqtatý, sporttyq ataǵynan aıyrý, Olımpıada, Paralımpıada jáne Sýrdlımpıada oıyndarynyń chempıony jáne júldegeri turǵyn úıdi paıdalaný shartyn buzý, sport túrleri boıynsha Qazaqstan Respýblıkasynyń qurama jáne shtattyq qurama komandalarynyń quramynan sportshylardy, jattyqtyrýshylardy shyǵarý jazalary qarastyrylǵan.

Toqaev qol qoıǵan zań boıynsha, Olımpıada, Paralımpıada jáne Sýrdlımpıada chempıondary men júldegerlerine 10 jyl merzimge jalǵa baspana berý, sondaı-aq dopıng-testilerdi saqtaý merzimi 10 jyl bolýyna baılanysty osy merzimge atalǵan turǵyn úıdi ıelikten shyǵarýǵa tyıym salý kózdelgen. Eger osy kezeńde synamalarda dopıng anyqtalmasa, turǵyn úı sportshynyń menshigine beriledi.

Qazaqstan sportshylar 2016 jyly dopıng paıdalandy degen kúdikke ilingen kezde qoǵamda synı pikirler kóp aıtylyp, "dopıng daýyna ilikken sportshylar memleketten alǵan syıaqylaryn qaıtarsyn" degen talaptar qoıylǵan. 2016 jyly Halyqaralyq olımpıada komıteti  2008 jyly Pekınde jáne 2012 jyly Londonda ótken olımpıadanyń dopıng synamalaryn qaıta 49 aýyr atlettiń analızinen dopıng tabylǵan. Olardyń basym bóligi - postsovettik elderdiń, Qytaı, Bolgarııa, Túrkııa atletteri.

"Qaıta tekserý" kezinde Pekın jáne Londonda chempıon atanǵan qazaqstandyq aýyr atlet Ilıa Ilınniń eki olımpıadadaǵy synamasynan dopıng tabylǵany habarlanyp, ol eki altynyn qaıtaryp bergen. Pekınde qola medal alǵan qazaqstandyq aýyr atlet Marııa Graboveskaıa, Londonda chempıon bolǵan Maıa Maneza, Zúlfııa Chınshanlo, Svetlana Podobedovanyń da analızderi oń nátıje berip, olar da medaldaryn qaıtarǵan. Pekın men London olımpıadasyna qatysqan Vladımır Sedov pen Almas О́teshov te dopıng qoldandy dep aıyptalǵan.

IWF (halyqaralyq aýyr atletıka federasııasy) sheshimimen Ilıa Ilın, Zúlfııa Chınshanlo, Maıa Maneza eki jylǵa, Svetlana Podobedova segiz jylǵa (eki ret dopıngpen ustalǵany úshin) sporttan shettetildi. Alǵashqy úsheýiniń jazasy 2016 jyldyń maýsymynan bastalyp eseptelip, 2018 jyldyń jazynda aıaqtaldy. Chınshanlo men Ilın sportqa oraldy. Al Maneza sporttan ketti.

Budan bólek, 2018 jyly qysta qazaqstandyq shańǵyshysy Alekseı Poltoranın Avstrııadaǵy álem chempıonaty kezinde qan dopıngin qoldanbaq boldy dep aıyptalyp, ýaqytsha jarystan shettetilgen. Halyqaralyq shańǵy federasııasy men Dúnıejúzilik dopıngke qarsy agenttik (WADA) Poltoranın isine qatysty áli naqty sheshim qabyldaǵan joq.