Bas prokýratýra qazaqstandyqtarǵa úndeý joldady

Qazaqstan bas prokýrorynyń orynbasary Bolat Dembaev elde ekstremıstik dep tanylǵan "QDT"  (Qazaqstannyń demokratııalyq tańdaýy) uıymynyń halyqty aksııaǵa qatysýǵa shaqyrýyna oraı úndeý jarııalady. Prokýrotýra úndeýi prokuror.gov.kz saıtynda jarııalandy.

Prokýratýra úndeýinde jekelegen adamdardyń, sonyń ishinde shetelden áleýmettik jeliler arqyly halyqty aldaǵy merekelerde "zańsyz mıtıngilerge qatysýǵa" shaqyrýshylardyń áreketi Qazaqstan zańyna qaıshy ekeni aıtylǵan.

"Bas prokýratýranyń túsindirýine jáne ákimshilik yqpal etý sharalaryna qaramastan, jekelegen adamdar, sonyń ishinde shetelden áleýmettik jeliler arqyly halyqty aldaǵy merekelerde zańsyz mıtıngilerge qatysýǵa shaqyrýdy jalǵastyrýda.

Bul adamdar "Beıbit jınalystar, mıtıngiler, sherýler, pıketter jáne demonstrasııalar uıymdastyrý men ótkizý tártibi týraly" zańnyń talaptaryn aıqyn buzýda. Atap aıtqanda, josparlanǵan mıtıng týraly habarlanǵanǵa deıin uıymdastyrýshylar belgilengen kúnge deıin 10 kún buryn jergilikti atqarýshy organdarǵa jazbasha ótinish bermegen. Onda olar: is-sharanyń maqsaty, nysany, ótkizilý ornyn nemese qozǵalys baǵyttaryn, onyń bastalý jáne aıaqtalý ýaqytyn, qatysýshylardyń boljamdy sanyn, uıymdastyrýshylardyń jáne qoǵamdyq tártipti saqtaýǵa jaýapty adamdardyń saýalnamalyq derekterin kórsetilýi tıis bolatyn. Bul mindetti talaptar aksııa qatysýshylarynyń ózderiniń, sondaı-aq basqa da azamattardyń qaýipsizdigin qamtamasyz etý úshin ǵana baǵyttalǵan. Sonymen qatar, ruqsat alǵanǵa deıin uıymdastyrýshy men basqa da tulǵalardyń mıtıng týraly jarııalaýǵa, oǵan qatysýǵa shaqyrýǵa, sondaı-aq osy maqsatta paraqshalar, plakattar jáne basqa da osyndaı materıaldardy daıyndaýǵa jáne taratýǵa quqyǵy joq ekenine nazar aýdaramyz. Basqasha aıtqanda, 16 jeltoqsanda zańsyz aksııalardy uıymdastyrýshylardyń is-áreketterinde ákimshilik quqyq buzýshylyq belgileri baıqalady (Ákimshilik quqyq buzýshylyq týraly kodekstiń 488-baby – beıbit jınalystardy uıymdastyrý jáne ótkizý tártibi týraly zańnamany buzý). Eger bul áreketter azamattardyń, uıymdardyń, qoǵamnyń nemese memlekettiń quqyqtary men zańdy múddelerine eleýli zııan keltirse, onda qylmystyq jaýaptylyq týyndaıdy (qylmystyq kodekstiń 400-baby – sanksııalanbaǵan aksııany uıymdastyrý ne oǵan qatysý, eger olar eleýli zalal keltirse). Ákimshilik jáne qylmystyq-quqyqtyq sharalar osyndaı aksııalardy qoldaıtyn adamdarǵa qatysty da birdeı dárejede qoldanylatyn bolady. Osyǵan baılanysty, Bas prokýratýra arandatýshylyq jasamaýǵa, qoldanystaǵy zańnamany múltiksiz saqtaýǵa jáne zańsyz mıtıngilerge qatysýdan bas tartýǵa shaqyrady" delingen prokýratýranyń úndeýinde. 

Buǵan deıin shetelde júrgen qýǵyndaǵy burynǵy bankır Muhtar Áblıazov áleýmettik jeli arqyly úndeý joldap, 16 jeltoqsanda  jaqtastaryn kóshege shyǵýǵa shaqyrǵan. Áblıazov jetekshilik etetin QDT qozǵalysy jaqtastaryn mıtıngige shyǵýǵa anda-sanda shaqyryp turady.  Sońǵy ret 26 qazanda QDT qozǵalysy ótkizgen mıtıngte polısııa alańǵa shyqqan azamattardy ustap, keıbireýin qamaǵan.