Kekilderin qaıyryp, jaqtaryn aıyrýǵa deıin baramyz – Talǵat Rysqulbekov (vıdeo)

Almatydaǵy Qazaqstan press-klýbynda bir top jeltoqsanshylar jıyn ótkizip, 16-17 jeltoqsan kúnderi qazaqstandyqtardy alańǵa shyqpaýǵa shaqyryp, úndeý tastady.

Jıynda "Jeltoqsan rýhy" qoǵamdyq birlestiginiń tóraǵasy, "Halyq qaharmany" Qaırat Rysqulbekovtyń inisi Talǵat Rysqulbekov, "Jeltoqsan aqıqaty" birlestiginiń tóraǵasy Bolat Qurymbaev, "Jeltoqsan juldyzdary" birlestiginiń dırektory Gúlmıra Mustafına, "Jeltoqsan-86-Táýelsizdik qyrandary" uıymynyń jetekshisi Gúlbahram Júnis sóz sóıledi.

Jeltoqsanshylar atalǵan datalarda mıtıngke shyǵýdy josparlap otyrǵandarǵa merekeni toılap, jeltoqsan oqıǵasy qurbandarynyń arýaǵyna taǵzym etýge kelgenderdiń shyrqyn buzbaýǵa, berekesin almaýǵa shaqyrdy.

Belsendilerdiń Prezıdent, Úkimet basshysy, Parlament, oblys, qala, aýdan, aýyl ákimderine qarata aıtylǵan úndeýinde "qandaı da bir qoǵamdyq birlestiktiń mereke jáne eske alý kúnderinde qandaıda bir narazylyq aksııa, mıtıng uıymdastyrýyna tyıym salynsyn, halyq janaıqaıyn jetkizýi úshin mereke kúnderinen basqa kúnder belgilenip, zańdy múmkindikter jasalsyn" degen usynys-talap bildirilgen.

"Jeltoqsan-86-Táýelsizdik qyrandary" uıymynyń jetekshisi Gúlbahram Júnistiń aıtýynsha, bul úndeý – eldegi barlyq jeltoqsan uıymdarynyń ortaq pikiri.

– Biz 2 jeltoqsanda jınalys ótkizdik. Oǵan jeltoqsanshy birlestikterdiń barlyǵy keldi. Sol jıynda osy úndeý qabyldandy, – degen qoǵam belsendisi "bul úndeý mıtıngke shyqqysy keletinderdiń quqyǵyn taptaý emes pe?" degen Qamshy.kz aqparat agenttigi tilshisiniń saýalyna tómendegideı jaýap berdi.

– Biz olarǵa esterińdi jıyńdar degimiz keledi. Bizdiń de narazylyǵymyz, bılikpen keliskeıtin tustarymyz bar. Qytaı ekspansııasyna qatysty, Saıragúldi qoldaýǵa baılanysty narazylyq aksııalaryn ótkizdik. Tipti "DVK-nyń (Qazaqstanda tyıym salynǵan "Qazaqstannyń demokratııalyq tańdaýy" uıymy – red.) adamdaryn shaqyrdyq, talaı shaqyrdyq. Nelikten ekeni, olar kelmedi. Olar Naýryz merekesinde, Balalardy qorǵaý kúninde shyǵady. Bul – uıat nárse. Halyqtyń berekesin alýǵa, olarǵa qaýip tóndirýge bolmaıdy. Demek olar "zakaz" oryndaýshylar. Olar ultty, eldi, urpaqty oılap otyrǵan joq. Máselen, balalar kúninde ózim nemerelerimmen serýendep júr edim, mılısııa qaptap, adamdar topyrlap, demalystyń shyrqyn buzdy. Balalardy alyp, qashyp ketýge týra keldi. Áıtpese men de "ıaryı" mıtıngshilerdiń birimin ǵoı. Sol kúni istegenderi durys bolmady. Olar halyqty paıdalanǵysy keledi. Halyq merekeni adam sııaqty toılaýy kerek. Shyqqysy kele me, basqa kúnderde shyǵa bersin, – dedi Gúlbahram Júnis.

Qaırat Rysqulbekovtyń inisi Talǵat Rysqulbekov atalǵan kúnderi alańǵa shyqqandardy aıamaıtynyn aıtty.

– Táýelsizdik merekesi men jeltoqsan oqıǵasy qurbandaryn eske alý kúninde talaptaryn aıtyp, alańǵa shyqqysy kelip otyrǵandarǵa basqa kez kelgen kúndi tańdańdar degim keledi. Meıli ol 8 naýryz –  qatyndar merekesi bola ma, áýlıe valentın kúni bola ma, tek 16, 17 jeltoqsan emes. Al myna kún – "jeltoqsanda" zardap shekkender men olardyń otbasylarynyń jeke kúni dese bolady. 16-sy kúni gúl shoqtaryn qoıyp, 17-si kúni quran oqyp, as beriletin. Bireýler talabyn qoıyp, shyqpaqshy degendi uzynqulaqtan estip jatyrmyn. Eskertemin, táýelsizdik kúnine tıtteı de bolsyn zııany tıetindeı sóz aıtylatyn bolsa, aıaqtaryn syndyramyz. Kekilderin qaıyryp, jaqtaryn aıyrýǵa deıin baramyz, – dedi.

Baspasóz máslıhatyn uıymdastyrǵan jeltoqsanshylar bul úndeý – eshqandaı da bıliktiń tapsyrysy emes ekenin jetkizdi.

♦ Oqı otyryńyz

Talǵat Aıtbaıuly: Jeltoqsandy qoldan uıymdastyrǵandar qazir bılikte otyr