«Nur Otan» partııasy qandastarǵa qoldaý kórsetedi

«Nur Otan» partııasy, Dúnıejúzi qazaqtarynyń qaýymdastyǵy jáne Otandastar qory ózara túsinistik memorandýmyna qol qoıdy. Úshjaqty memorandýmǵa qol qoıýdaǵy basty maqsat – dúnıejúzindegi qazaqtardy tarıhı otany tóńiregine uıystyrýǵa qoldaý kórsetý, atajurttan tys jerde, basqa elde týyp ósip, elge oralǵan qandastarymyzǵa kómek qolyn sozý.

Elbasy, «Nur Otan» partııasynyń Tóraǵasy Nursultan Nazarbaev Dúnıejúzi qazaqtarynyń kezekti quryltaılarynyń birinde: «Sheteldegi qazaqtardyń elge jıi kelip, týǵan jerimen baılanystaryn nyǵaıtyp otyrǵany durys. Qaı elde tursańyzdar da, árdaıym Qazaqstandy júrekterińizdiń tórinde ustańyzdar. Qazaqtyń tarıhı otany bireý-aq. Ol – Qazaqstan», - degen edi.

Osy oraıda, «Nur Otan» partııasy Tóraǵasynyń birinshi orynbasary Baýyrjan Baıbek shet elderdegi jáne Qazaqstanǵa kelgen etnıkalyq qazaqtardy qoldaýǵa baǵyttalǵan elimizdiń strategııalyq josparlaryn júzege asyrý jumystaryna atsalysýǵa partııanyń árqashan ázir ekenin jetkizdi. Sondaı-aq, ol elimiz táýelsizdik alǵaly beri Elbasynyń bastamasymen tarıhı Otanyna bir mıllıonnan astam qazaq qaıtyp oralǵanyn, sonyń arqasynda ultymyzdyń demografııalyq jaǵdaıy qandastarymyzdyń úlesi esebinen jaqsarǵany týraly aıtty.

«Partııamyzdyń doktrınasynda jazylǵandaı, bizdiń negizgi qundylyǵymyz – adam, onyń qadir-qasıeti men quqyqtary, amandyq-saýlyǵy men zańdyq múddeleri. Sondyqtan, «Nur Otan» elge kóship kelgen otandastarymyzdy únemi qoldap otyrady. Qazaqstan Prezıdenti Qasym-Jomart Toqaev óz sózinde: «Oralmandar» dep atalyp júrgen turǵyndarymyzben jumys isteımiz, olardy bizdiń qoǵamymyzǵa beıimdelip, jaqyn tartý úshin qandastar dep ataýdy usynamyn», – dedi. Sondyqtan, osy memorandýmnyń aıasynda «Otandastar» qory jáne Dúnıejúzi  qazaqtarynyń qaýymdastyǵymen birlesip, týǵan jerge kóship kelgen otandastarymyzǵa tirkelý, Qazaqstan azamattyǵyn alý jáne basqa máseleler boıynsha quqyqtyq keńes pen aqparattyq kómek berip otyramyz. Elimizge kóship kelgen ár azamat beıimdeýden ótip, tez arada eńsesin tiktep, etek-jeńin jıyp, otbasymen, bala-shaǵasymen el qatarly turýy kerek. Olardyń barlyǵy memleketimizdiń, partııanyń, tutas halqymyzdyń qoldaýyn sezinýi tıis»,- dedi Baýyrjan Baıbek.

Al Otandastar qorynyń prezıdenti Nurtaı Ábiqaev qor qurylǵan kúnnen bastap osy kúnge deıin atqarylǵan jumystarǵa jan-jaqty toqtalyp, birlesken memorandýmnyń mańyzdylyǵyn atap kórsetti.  

«Búgingi qol qoıylatyn memorandým «Nur Otan» partııasymen birigip, osy baǵyttaǵy jumystardy jandandyrýǵa múmkindik beredi degen oıdamyz. Partııanyń elimizdiń barlyq aýdandarynda fılıaldary baryn eskersek, qandastardy qoldaýǵa baǵyttalǵan jumysymyzdyń ónimdi bolatyny sózsiz», - dedi qor prezıdenti.

О́z kezeginde Dúnıejúzi qazaqtarynyń qaýymdastyǵy Tóraǵasynyń birinshi orynbasary Zaýytbek Turysbekov aldaǵy ýaqytta úshjaqty memorandýmnyń negizinde jastarmen, medıa jáne basqa da salalarda birlesken jumystar atqarylatynyn tilge tıek etti.  

Aıta keteıik, 1989 jylǵy málimet boıynsha, elimizdegi qazaqtardyń sany 6,5 mıllıon adam bolsa, ıaǵnı jalpy Qazaqstandaǵy halyq sanynyń 39%-yn qurasa, qazir bul kórsetkish 70%-ǵa jetti. Táýelsizdiktiń alǵashqy jyldarynda mektepterdiń bar-joǵy 30%-y qazaq tilinde bilim bergen edi. Búginde Elbasy saıasatynyń arqasynda ana tilimizdi saqtap qana qoımaı, ony Qazaqstanda ǵylym men bilim salasynyń negizgi tiline aınaldyrý úshin barlyq jaǵdaı jasaldy. Qazirgi kezde mektepterdiń 70% qazaq tilinde bilim beredi. Memlekettik tilde oqıtyn stýdentterdiń úlesi – 64,5% quraıdy. Qazaq tiliniń qoldaný aıasy burynǵymen salystyrǵanda aıtarlyqtaı keńeıdi.