2019 jyly qazaqstandyqtardyń Google-dan neni kóp izdegeni anyqtaldy

Alphabet holdıngtik kompanııasy Google-dyń qazaqstandyq  paıdalanýshylarynyń 2019 jyly eń kóp izdegen suraýlarynyń reıtıngin shyǵardy.

Kóshti "Igra prestolov" serıalynyń 8-maýsymy" bastap tur. Qazaqstandyqtardy qyzyqtyrǵan suraýlardyń alǵashqy ondyǵyna qazaq-orys aýdarmashysy, kontınentaldyq hokkeı lıgasy, "Mstıtel" fılminiń fınaldyq bólimi, "Vetrenyı", "Pırogova IP" serıaldary engen.

Jyl qorytyndysy kórsetkendeı qazaqstandyq Google paıdalanýshylaryn ataqty adamdar men saıasatkerler týraly aqparat ta qyzyqtyrǵan.

"Jyl adamy" ataǵyna jyl basynda kenetten ómirden ótken reseılik tanymal telejúrgizýshi, ánshi jáne aktrısa Iýlııa Nachalova ıe boldy. Eń kóp izdelgender tiziminde ekinshi bolyp prezıdent Qasym-Jomart Toqaev tur. Sondaı-aq Google-dyń qazaqstandyq qoldanýshylarynyń basym kópshiligi Vladımır Zelenskıı, Janar Hamıtova, Desl, Ámirjan Qosanov, Alla Verber jáne Bıllı Aılısh týraly aqparat izdegen.

2019 jyly kóp suralǵan fılmder qataryna "Mstıtelı. Fınal", "Korol Lev" jáne "Djoker" engen. Serıaldarǵa kelsek, qazaqstandyqtar ádettegideı túrik jáne Ońtústik Koreıa hıkaıalaryna basymdyq beripti. "Kóp izdelgen serıaldar" sanatyn bastap turǵan "Igra prestolov" serııalynyń sońǵy maýsymynan keıingi oryndarda "Vetrenyı", "Jestokıı Stambýl", "Lıýbov napokaz" hıkaıalary men "Otel del Lýna" jáne "Izıashnaıa semıa" dramalary jaıǵasqan.

 «...degenimiz ne?» degen suraqty qoıa otyryp, paıdalanýshylar "podagranyń" ne ekenin jıi bilgisi kelgen. Sondaı-aq kóshbasshylar úshtigine "VPN" jáne "Epıtet" boıynsha suranystar enipti.

"Kóp jasalǵan saýda-sattyq" sanatynda temir jol bıleti 2019 jyly taǵy da jeńimpaz boldy. Sondaı-aq qazaqstandyqtar avıabıletter, kınoǵa, FlyArystan áýekompanııasyna jáne «Manchester Iýnaıted – Astana» matchyna bıletter satyp alýǵa qyzyǵýshylyq tanytqan.