Eks-ákimniń inisi "534 mıllıon jymqyrdy" degen kúdikke ilindi

Soltústik Qazaqstan oblysynyń eks-ákimi Serik Bilálovtiń inisi Erik Bilálovtyń jemqorlyqqa qatysy bar bolýy múmkin. Bul týraly Soltústik Qazaqstan oblysy ekonomıkalyq tergeý departamentine silteme jasaǵan KTK arnasy habarlady.

KTK-nyń habarlaýynsha, óńirdegi eń iri qus fabrıkasynyń dırektory Erik Bilálov pen onyń bas esepshisi memleketten sýbsıdııa retinde bólingen 500 mıllıon teńgeni jymqyrdy degen kúdikke ilinip otyr. 

- Somasy 534 mıllıon teńgelik sýbsıdııa aqshasyn jymqyrý faktisi bar. Biraq kúdiktiler qamaýǵa alynbady. Olarǵa aıyp ta taǵylǵan joq. Sot aldy tergeý amaldarynan keıin istiń anyq-qanyǵy belgili bolady, - dedi SQO ekonomıkalyq tergeý departamentiniń basqarma basshysy Rahym Maqajanov. 

Erik Bilálovtiń eki aǵasy da joǵary laýazymdy sheneýnik bolǵan. Serik Bilálov eńbek jolyn osy qus fabrıkasynda zootehnık bolyp bastaǵan. Ol 2007-2013 jylydary Soltústik Qazaqstan oblysynyń ákimi bolǵan. 2013 jyly osy oblystyń atynan Parlamenttiń joǵary palatasy Senatqa depýtat bolyp saılandy.  Al taǵy bir baýyry, general Berik Bilálov Aqmola oblysy polısııa departamentiniń bastyǵy qyzmetin atqarǵan.