09 Jeltoqsan, 2019 Aımaqtar

Jańa jyldan bastap áleýmettik járdemaqynyń jańa túri berilmek

Qazaqstanda 2020 jyldan bastap 347 myń otbasyǵa járdemaqynyń jańa túri beriledi. Bul týraly eńbek jáne halyqty áleýmettik qorǵaý mınıstri Birjan Nurymbetov Nur-Sultanda "Ataýly áleýmettik kómek boıynsha memlekettik saıasattyń júzege asyrylýy" taqyrybynda ótken úkimet saǵatynda aıtty.

Mınıstrdiń sózinshe, 2020 jyldyń 1 qańtardan bastap kámeletke tolmaǵan 4 jáne odan da kóp balalary bar otbasylarǵa járdemaqy taǵaıyndalǵanda otbasynyń tabysyna qaramaıdy. 4 balaǵa 42 496 teńge; 5 balaǵa 53127 teńge; 6 balaǵa 63 757 teńge; 7 jáne odan kóp balaǵa 74 388 teńge beriledi.

"Ataýly áleýmettik kómek alyp júrgenderdiń 60 paıyzy kópbalaly otbasylarǵa tıesili. Bul eń áljýaz topqa jatatyndary. Balanyń sany kóbeıgen saıyn aýyrtpashylyq da artady, osyǵan baılanysty zań jobasy boıynsha 2020 jyldan bastap kópbalaly otbasylarǵa bólek jańa járdemaqy qarastyryldy. Iаǵnı 4 jáne odan da kóp kámelet jasyna tolmaǵan balalary bar otbasynyń tabysyna qaramastan, járdemaqy engizý kózdelip otyr. Esebimiz boıynsha jańa járdemaqyǵa jańa jyldan bastap 347 myń otbasy ıe bolady. Onyń mólsheri 42 500 teńgeden 74 000 teńgege deıin", - dedi Nurymbetov. 

Mınıstr jańa jyldan bastap "kepildendirilgen áleýmettik toptama" berile bastaıtynyn da aıtty. Bul áleýmettik toptamanyń sharty boıynsha, 1 jastan 6 jasqa deıingi tabysy az otbasy balalaryna azyq-túlik jáne gıgıena quraldary, 6 jastan 18 jasqa deıingi balalarǵa mektepterde ystyq tamaq berilip, oqý quraldarymen jáne mektep kıimmen qamtamasyz etiledi, mektepke deıingi jol shyǵyndary óteledi. 

 

Eske salsaq, Qazaqstan prezıdenti Qasym-Jomart Toqaev 2 qyrkúıekte halyqqa joldaǵan joldaýynda turmysy tómen otbasylarǵa arnalǵan ataýly áleýmettik kómekti "azamattardy eńbekke yntalandyratyn, ashyq, ádil jolmen berýdi" aıtqan. 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir