07 Jeltoqsan, 2019 Barlyq aımaqtar

UQK: Eki etnıkalyq qazaqty Qytaıǵa qaıtaramyz

Qytaıdan Qazaqstanǵa "shekarany zańsyz kesip ótti" dep aıyptalǵan etnıkalyq qazaqtar Qaster Musahanuly men Murager Álimulyn Qytaıǵa qaıtarylady dep málimdedi Qazaqstan Ulttyq qaýipsizdik komıteti tóraǵasynyń orynbasary, shekara qyzmetiniń dırektory Darhan Dilmanov. Bul týraly Qamshy.kz aqparat agenttigi Azattyqtyń deregin negizge alyp. 

"Sot jáne qylmystyq jaýapkershilikke tartý sharalary túgeldeı aıaqtalǵannan keıin biz bul azamattardy meıli Qytaı bolsyn, meıli basqa memleket bolsyn, kelgen eline qaıtaramyz. Naqty bul jaǵdaıda biz Qytaı Respýblıkasyna shekaralyq ókildik qyzmeti arqyly tapsyramyz. Ári qaraı kórshi memleket máselemen ózi aınalysady" dedi Darhan Dilmanov. Onyń sózinshe, eki azamatqa qatysty sot jaqynda bastalýy tıis. Dilmanov Qazaqstannyń zańsyz kóshi-qon prosesimen "qatań kúresetinin" aıtqan.

Musahanuly men Álimulynyń advokaty Lázzat Ahatova ol "ekeýi Qytaı jaǵyna tapsyrylatynyn" aıtqan shekara qyzmetiniń dırektory Darhan Dilmanovpen kelispeıdi.

"Qytaı men Qazaqstan arasynda 2006 jyly 14 jeltoqsanda jasalǵan kelisimde memlekettik shekarany shatasyp, ne ańdamaı buzyp ótken eki el adamdary jeti kún ishinde qaıtarylady delingen. Sotqa jetpeı, jeti kún ishinde. Al bizdiń jaǵdaıda eki jigit shekarany qazan aıynda buzyp ótken. Qazir jeltoqsan aıy. Iаǵnı, jeti kún emes, eki aıdan asyp ketti. Odan ózge, eki jigittiń ústinen Qylmystyq kodekstiń 392-babymen qylmystyq is qozǵaldy. Ol is tolyq aıaqtalmaı, sot sheshim shyǵarmaı, Qaster men Muragerdi eshkim eshqaıda qozǵaı almaıdy" dep jazdy advokat 6 jeltoqsanda Facebook áleýmettik jelisindegi paraǵyna.

Qazan aıynyń basynda Qytaı qazaqtary Qaster Musahanuly men Murager Álimulynyń Qazaqstanǵa "shekarany zańsyz kesip ótkeni" týraly aqparat taraǵan. 14 qazanda Almatydaǵy adam quqyǵyn qorǵaý bıýrosynda ótken baspasóz máslıhatynda Qaster Musahanuly Shyńjańdaǵy "saıası lagerde qamaýda bolǵanyn", Murager Álimuly Qytaıda "qysym kórgenin" aıtqan edi. Qazan aıynyń ortasynda UQK olardy "shekaradan zańsyz ótti" dep aıyptap, О́skemen qalasyndaǵy tergeý ızolıatoryna jetkizgen.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir