Halyk Bank qolma-qol aqshasyz tólem qyzmetterin tanystyrdy

Trend pen búgingi kúnniń shyndyǵyna aınalǵan qolma-qol aqshasyz esep aıyrysý úrdisi jańa qos qyzmetpen tolyqpaq. Ony Halyk Bank usynyp otyr.

Alǵashqysy – android smartfondarǵa arnalǵan homebank mobıldik qosymshasy arqyly arnaıy POS-termınaldarda janasýsyz tólem jasaý qyzmeti. Bul qyzmetti júzege asyrý úshin smartfonda NFC modýli ornatylǵan bolýy kerek. Sondaı-aq mobıldik qosymshaǵa tirkeý arqyly kez kelgen Visa kartasymen tóleý jasaýǵa bolady.

Bank ókilderiniń aıtýynsha, elektrondyq tólemniń bul túri qaýipsiz. О́ıtkeni qosymshaǵa qosylǵan qurylǵy bank kartasynyń nómirin saqtamaıdy eken.

Karta tirkelgen homebank qosymshasy arqyly tólem jasaý op-ońaı. Bar bolǵany qosymshaǵa kirip, NFC tólem jasaý belgisin tańdaǵan soń smartfondy janasýsyz tólem jasaý fýnksııasy bar POS-termınalǵa jaqyndatý kerek. Bary sol. Atalmysh qyzmet jýyq aralyqta homebank qoldanýshylaryna jańartý kelgen sátten qol jetimdi bolmaq.

Halyk Bank basqarma tóraǵasynyń orynbasary Asqar Smaǵulovtyń sózinshe, Halyk Bank janasýsyz tólem jasaýdyń ınnovasııalyq tehnologııalaryn paıdalana otyryp, qolma-qol aqshasyz tólemderdi belsendi damytyp keledi.

Banktiń qolma-qol aqshasyz tólem jasaýdaǵy jańashyldyqtary tanystyrylǵan sharadaǵy usynylǵan kezekti qyzmet túri Tap to Phone tehnologııasy.

Halyk Bank jáne Visa kompanııasy birlesip jasaǵan ınnovasııalyq tehnologııa NFC-modýli bar Android bazasyndaǵy smartfondy qosymsha jabdyqsyz POS-termınalǵa aınaldyrýǵa múmkindik beredi. Bul sheshim orta jáne shaǵyn bıznes kásiporyndarynyń operasııalyq qyzmetin jeńildetedi. Janasýsyz tólemderdi qabyldaý jelisin aıtarlyqtaı keńeıtip, saýda núkteleriniń klıentter bazasyn ulǵaıtýdy jáne ekvaırıng qyzmetterine qosylý qunyn barynsha azaıtýǵa jol ashady.

Kásipker Tap to Phone arqyly tólemderdi qabyldaý úshin Payswiff kompanııasy ázirlegen Halyk Pos qosymshasyn júktep alyp, Halyk Bank-pen ekvaırıng shartyn jasaýy tıis.

Búginde testileýden ótip jatqan uosymsha 2020 jyly iske qosylmaq.

Visa-nyń Ortalyq Azııadaǵy bas menedjeri Álııa Chynybaevanyń aıtýynsha, Qazaqstanda, iri qalalardan tys jerlerde, ásirese óńirlerde qolma-qol aqshasyz tólemderdi qabyldaý jelisi, áli de damýy qajet. Búginde eldegi árbir 1 000 turǵynǵa tólem qabyldaıtyn 10 termınaldan keledi eken. Bul kórsetkish naryqtyń sıfrly jolǵa tolyqtaı kóshýge jetkiliksiz ekenin aıǵaqtaıdy. Sondyqtan Tap to Phone tehnologııasy syndy sheshimderdiń dúnıege kelýi asa mańyzdy.