Berdibek Saparbaev: Járdemaqynyń úsh túri bolady

Qazaqstan premer-mınıstriniń orynbasary Berdibek Saparbaev ataýly áleýmettik kómekke qujat tapsyrý jáne alý tetigin túsindirdi. Ol qazaqstandyqtardan dúrbeleńge salynbaýdy surady dep jazady Qamshy.kz aqparat agenttigi sputniknews.kz saıtynyń deregin negizge alyp. 

"Dúrbeleń jasaýdyń qajeti joq. Tizimdi naqtylap alý kerek, sodan keıin HQKO-da ataýly áleýmettik kómek tóleýdiń jańa tetigin túsindiredi. Biz jańa mehanızm engizip jatyrmyz. Járdemaqynyń úsh túri bolady", - dedi Berdibek Saparbaev Qazaqstan Respýblıkasy máslıhattarynyń qurylǵanyna 25 jyl tolýyna arnalǵan respýblıkalyq konferensııanyń kýlýarynda.

Járdemaqynyń birinshi túri – tórt nemese odan da kóp bala tárbıelep otyrǵan otbasylarǵa beriletin memlekettik arnaıy járdemaqy. Ol tabysyna qaramastan kez kelgen kóp balaly otbasyǵa tólenedi.

Ekinshi túri – ataýly áleýmettik kómek (AÁK). Bul járdemaqy eń tómengi kúnkóris deńgeıine shaqqandaǵy otbasynyń jıyntyq kirisine baılanysty burynǵy tetikke sáıkes tólenedi.

Úshinshi túri – kepildendirilgen áleýmettik paket.

Buǵan deıin habarlanǵandaı, Qazaqstannyń halyqqa qyzmet kórsetý ortalyqtarynda AÁK alýshylardyń saldarynan dúrbeleń týyp, uzyn-sonar kezek paıda bolǵan. Kóbisi járdemaqy alýǵa qujat tapsyrý merzimi shekteýli dep oılaǵan.

Premer-mınıstr orynbasarynyń aıtýynsha, eshqandaı shekteý joq. Qańtardaǵy merekelerde halyqqa qyzmet kórsetý ortalyqtarynda dúrbeleń týdyrmaý úshin adamdarǵa qajetti qujattar paketin daıyndaý týraly aldyn ala habarlanady.

Ataýly áleýmettik kómek alýshylardyń tiziminde bar-joq ekenińizdi Eńbek mınıstrliginiń saıtynda teksere alasyz.