Medısınalyq saqtandyrý qory 2019 jyldyń on aıynda respýblıka turǵyndaryna kórsetilgen tegin medısınalyq kómek sapasyn baqylaý jumystarynyń nátıjesin qorytyndylady. Monıtorıng nátıjesinde Almaty qalasy boıynsha 347 mln teńgeniń qyzmeti túrli kemshiliktermen kórsetilgeni anyqtaldy. Bul týraly «Áleýmettik medısınalyq saqtandyrý qory» KEAQ Almaty fılıaly habarlady.
Medısınalyq saqtandyrý qorynyń baspasóz qyzmeti taratqan habarlamaǵa súıensek, kemshiliktiń basym bóligi stasıonarlyq jáne stasıonardy almastyratyn kómek uıymdaryna tıesili. Monıtorıng nátıjesinde olardan 284 mln teńgeden astam qarjy qaıtaryp alynǵan. Konsýltatıvtik-dıagnostıkalyq kómek uıymdary 11,7 mln teńgeniń qyzmetin kemshilikpen kórsetkeni belgili boldy. Qalǵan 11,9 mln teńgeden astam aıyppul jedel járdem, qan qyzmeti men patologoanatomııalyq qyzmet sýbektilerine salyndy.
– Monıtorıng barysynda anyqtalǵan kemshilikterdiń deni emdeý-dıagnostıka barysynda belgilengen standarttardan aýytqý, medısınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa kelip saıady. Sonymen qatar, kórsetildi dep jazylǵan belgili bir qyzmet túrleriniń shyn máninde kórsetilgenin rastaı almaǵan klınıkalar da bar, – dedi MSQ Almaty fılıalynyń Medısınalyq qyzmet sapasyn baqylaý bólimi basshysy Ásem Manapbaeva.
Onyń aıtýynsha, qazirgi tańda monıtorıng menshik quqyǵyna qaramastan, memlekettik tapsyrys alǵan barlyq medısına uıymdarynda júrgiziledi. Jyl basynan beri saraptamanyń úsh deńgeıli úlgisi qoldanysqa engizildi. Naqtyraq aıtqanda, adam ólimi bolǵan jaǵdaıda saraptama emhanalyq-ambýlatorlyq kómek, jedel járdem jáne stasıonar deńgeıinde (syrqattyń em-dom alý úshin júrip ótken marshrýty boıynsha) jasalyp, jiberilgen kemshilikterdiń ózara baılanysy anyqtalady.
Esterińizge sala ketsek, ońtústik astanada 178 medısına uıymy memlekettik tapsyrys sheńberinde halyqqa tegin kómek kórsetip jatyr. Olarmen bekitilgen kelisimsharttyń jalpy somasy 117,3 mlrd teńgeden asady.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir