05 Jeltoqsan, 2019 NEWS

Q.Toqaev sózden súrindi. Halyqaralyq daý týýy múmkin

oinet.kz

QR prezıdenti Qasym-Jomart Toqaevtyń "Nemsova. Intervıý" baǵdarlamasyna bergen suhbatynda Qyrym máselesi, Qytaıdaǵy az ulttarǵa kórsetilip jatqan qysym, Qazaqstandaǵy jalǵyz adamdyq narazylyq aksııalary týraly aıtqan málimdemeleri áleýmettik jelide qyzý talqylanyp, halyqaralyq daýǵa aınalýdyń az-aq aldynda tur.

Áńgimeni sońǵy aıtqanymyzdan bastasaq. Q.Toqaevtyń Qyrym oqıǵasyna qatysty basyp alý, ıaǵnı anneksııa sózin qoldaný tym aýyr deýi Ýkraına bıligine unaı qoımady. Málimdemeden soń Ýkraına Syrtqy ister mınıstrliginiń baspasóz qyzmeti Qazaqstanǵa qatysty demarsh jarııalaýdy josparlap jatqanyn, Toqaev málimdemesine úlken alańdaýshylyq bildire otyryp, prezıdent sózi ýkraın-qazaq qarym-qatynasyna, halyqaralyq dárejede moıyndalǵan ustanymǵa, 2014 jyldyń 27 naýryzynda BUU Bas assambleıasy qabyldaǵan №A/RES/68/262 rezolıýsııaǵa qarama-qaıshy keletinin habarlady.

Al reseılik tarap bolsa, kerisinshe Q.Toqaevtyń bul aıtqandaryn jaqsylyqqa joryp jatyr. Qyrym parlamentiniń vıse-spıkeri Efım Fıks buny «Qyrymdy Reseıdiki dep tanýdyń álemdik saıasattaǵy kezekti kórinisi» dep baǵalady.

Jýrnalıstiń Qytaıda ıslam dinin ustanatyn uıǵyr, qazaq syndy etnos ókilderine baılanysty kórsetilip jatqan qysym týraly saýalyna prezıdenttiń «halyqaralyq quqyq qorǵaý uıymdarynyń kóptegen habarlary shyndyqqa sáıkes kelmeıdi. Qytaıdaǵy etnıkalyq qazaqtar máselesin qasaqana qozdyrý bar» dep túıitkil tórkinin Qytaı men AQSh arasyndaǵy saýda soǵysyna jaba salýy da áleýmettik jelide túrli talqylaýǵa túrtki bolýda.

Sondaı-aq prezıdenttiń Qazaqstanda jalǵyz adamdyq pıketterde eshkim ustalyp jatqan joq degen jaýaby shyndyqqa janaspaıtyny da kópshilikke málim. 12 qazanda Almaty Arbatynda jalǵyz adamdyq pıket uıymdastyrǵany úshin belsendiler – Ashat Jeksebaev, Serik Aıtjanov jáne Noıan Rahymjanovtyń jaýapkershilikke tartylǵany belgili. Arnaıy aýdanaralyq ákimshilik sotta ótken otyrysta sýdıa Serik Aıtjanovqa 50 AEK mólsherinde aıyppul salyp, Noıan Rahymjanovty 7 táýlikke ákimshilik qamaýǵa alý, Ashat Jeksebaevty 10 táýlikke qamaý týraly sheshim shyǵarǵan bolatyn.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir