Qazaqstannyń mınıstrleri tizerlep otyryp, arnaıy kýrstan ótti

Trenıngtik ortalyqtyń alǵashqy kýrsyna mınıstrler – Eljan Birtanov, Ashat Aımaǵambetov, Erlan Turǵymbaev, Aqtoty Raıymqulova, Birjan Nurymbetov jáne Nur-Sultan ákimi Altaı Kólginov qatysty dep jazady Qamshy.kz aqparat agenttigi sputniknews.kz saıtynyń deregin negizge alyp.

Qazaqstannyń mınıstrleri Amerıka kardıologııa qaýymdastyǵynyń bazalyq júrek reanımasııasy kýrsynan ótti, dep habarlady densaýlyq saqtaý mınıstrliginiń shuǵyl medısına boıynsha ulttyq úılestirý ortalyǵy.

Sonyń negizinde bazalyq jáne keńeıtilgen júrek reanımasııasyn (BLS, ACLS) oqytýdan halyqaralyq trenıngtik ortalyq ashylǵan bolatyn. Amerıka kardıologııa qaýymdastyǵynyń akkredıtasııasynan ótken ondaı ortalyq TMD aýmaǵynda alǵash ret ashylyp otyr.

Halyqaralyq trenıngtik ortalyq Qazaqstan halqynyń qan aınalymy júıesi aýrýlaryn, sonyń ishinde emdeýge deıingi kezeńde ólim-jitimdi azaıtý úshin ashylǵan. Negizgi maqsaty –  biryńǵaı standarttar boıynsha medısına qyzmetkerlerin, sondaı-aq respýblıka halqyn bazalyq reanımasııa (BLS) sharalaryn kórsetýge úıretý.

Ortalyqtyń alǵashqy kýrsynan Qazaqstannyń densaýlyq saqtaý mınıstri Eljan Birtanov, ǵylym jáne bilim mınıstri Ashat Aımaǵambetov, ishki ister mınıstri Erlan Turǵymbaev, mádenıet jáne sport mınıstri Aqtoty Raıymqulova, eńbek jáne halyqty áleýmettik qorǵaý mınıstri Birjan Nurymbetov jáne Nur-Sultan qalasynyń ákimi Altaı Kólginov ótti.

"Qazaqstannyń aýmaǵynda halyqaralyq trenıngtik ortalyq qurý shuǵyl medısına, tótenshe jaǵdaılar qyzmeti jáne quqyq qorǵaý organdary qyzmetkerleriniń bazalyq jáne keńeıtilgen reanımasııasyn kórsetýdi úzdiksiz jáne sapaly oqytýdyń senimdi júıesin qurýǵa múmkindik beredi", - deıdi densaýlyq mınıstri Eljan Birtanov.

Aıta keteıik, Amerıka kardıologııa qaýymdastyǵy (AHA) kardıologııa salasynda medısınalyq zertteýlermen, kardıologııalyq aýrýlardan týyndaǵan múgedektik pen ólim-jitimdi tómendetý maqsatynda tıisti medısınalyq kómekke yqpal etetin salaýatty ómir salty týraly bilim berý jobalarymen aınalysatyn AQSh-taǵy kommersııalyq emes uıym bolyp sanalady.