Almatyda jyl basynan beri 34,4 myń jumys orny quryldy

Tıimdi jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan memlekettik «Eńbek» baǵdarlamasy aıasynda bıyl 13 000 adam turaqty jumys kózin tapsa, 6000 azamat ýaqytsha jumysqa ornalasty. Bul týraly Almaty qalalyq Jumyspen qamtý ortalyǵy habarlady.

Baǵdarlamada budan ózge «Bastaý Bıznes» jobasy boıynsha kásipkerlik negizderin oqytý jáne jańa bıznes-ıdeıalardy júzege asyrý úshin 100 aılyq eseptik kórsetkishke deıingi memlekettik granttar usyný qarastyrylǵan. Áleýmettik az qamtylǵan jáne kóp balaly otbasylar, eńbekke qabiletti múgedekter men jastarǵa jańa bıznes-ıdeıalaryn júzege asyrý úshin 200 AEK nemese 505 myń teńgege deıin memlekettik grant beriledi.

NEET sanatyndaǵy jumyssyz azamattar men jastar úshin bazarlarda, temirjol vokzaldarynda, jármeńkelerde jáne basqa da qoǵamdyq oryndarda jumyspen qamtýdyń 10 jyljymaly ortalyǵy quryldy.

Nátıjesinde jumyssyzdyq deńgeıiniń aıtarlyqtaı tómendegeni baıqalady. Búgingi kúni ol kórsetkish 5,1 paıyzdy (2014 j. – 5,5%, 2018 j. – 5,2%) quraıdy.

Eńbek naryǵyn keńeıtý úshin Almaty qalasynyń Jumyspen qamtý ortalyǵy @enbek_almaty_bot Telegram botynyń iske qosylatyndyǵyn jarııalady. Onlaın-platforma memlekettik qyzmetter týraly aqparat berýge, sondaı-aq azamattar úshin keri baılanys quraldaryn usynýǵa arnalǵan.