Nıkolıa Sarkozı:  Eýropa qurdymǵa ketti, oǵan kináli –Tramp  

Fransııanyń burynǵy prezıdenti Nıkolıa Sarkozı Eýropanyń qurdymǵa ketip bara jatqanyna alańdaıdy. Fransýzdardyń eks-prezıdenti N. Sarkozı Mundo gazetiniń saıtyna bergen suhbatynda álemdik saıasatta Eýroodaq memleketteriniń naǵyz oıynshy bola almaı otyrǵanyn aıtty. Al oǵan kináli kim?

–Ǵasyrlar boıy álemdik órkenıettiń kindigi Eýropa qurlyǵy sanalyp keldi. Al qazirgi damý Shyǵysqa qaraı oıysa bastady. Álemde 7 mıllıardtan astam adam turatyn bolsa, onyń 4  mıllıardy Azııa memleketteri aýmaǵynda turady. Al Eýropany mekendep jatqandardyń sany shamamen 800 mıllıon adam ǵana. Biz álemdik damýdyń  ortalyǵyna aınala almaı otyrmyz. Onyń basty sebebi –demografııalyq ósimniń kúrt tómendeýi,–deıdi eks-prezıdent Nıkolıa Sarkozı.

Eks-prezıdenttiń oıynsha, 27 eldiń basyn qosqan «qart qurlyq» elderin ázirge birtutas uıym dep ataýǵa kelmeıdi. Brekzıt  máselesi muny naqty aıqyndap berdi. Qazir EýroOdaqty biriktirip turǵan tórt nárse ǵana, ol–shengen aımaǵy, eýro, qorǵanys jáne odaq qana.

Nıkolıa Sarkozı sondyqtan bolashaq Eýropanyń qalaı bolmaǵyn oılaý kerek, ol úshin eski tujyrymdamalardan bas tartqan jón dep sanaıdy.

–Bizdiń óz armanymyz bolǵany durys. Adamdar qaıda bara jatqanyn bilýi kerek. Áreketsiz otyrǵanymyzdan qaıda baǵyt alǵanymyzdy qazir ańǵarý qıyn. Eski eýropalyq órkenıetten qalǵan jurnaq bizdiń áli de óz armanymyz men ambısııamyzdyń baryn dáleldep otyr. Sondyqtan da Eýropany óltirmeýimiz kerek. Al Tramp «amerıkalyq armanyn» júzege asyrǵysy keledi,  ol Eýropanyń álsiregenin qalaıdy,–deıdi Fransııanyń eks-prezıdenti Nıkolıa Sarkozı.