Kreatıvti ındýstrııalarǵa basty nazar aýdarylady

Almaty Investment Forum 2019 barysynda qala ákimi Baqytjan Saǵyntaev Almatyda barynsha áleýeti 8 basty kreatıvti ındýstrııalar anyqtalǵanyn jáne olardy damytýǵa basty nazar aýdarylatynyn aıtty:

Birinshiden, kıno jáne anımasııa.

Almaty kıno óndirisi úshin qolaıly qala bolyp tabylady. Qalada orta eseppen jyldyń 220 kúninde aýa raıy jyly.

Bes klımattyq aımaq, keremet peızajdar men damyǵan ınfraqurylym kez kelgen janrdaǵy, aıtalyq, tarıhıdan fentezıge deıingi fılmderdi túsirýge zor múmkindikter beredi.

Qazirdiń ózinde Almaty men Almaty oblysyn álemniń túrli elderinen kelip beınebaıandar, jarnama men derekti fılmder túsirý úshin stýdııalar kelýde.

Barlyq qajetti jaǵdaı týǵyzý úshin qala ákimdigi janynan arnaıy organ – Almaty Film Commission qurylady.

Bul qurylym bir tereze qaǵıdaty boıynsha, Almatyda jáne osy aımaqta da túsirilimderdi uıymdastyrýda sheteldik jáne otandyq kınokompanııalarǵa qoldaý kórsetetin bolady.

Kınobıznes, bilim men memleket ókilderiniń tyǵyz baılanysynyń arqasynda biz otandyq kınematografty damytyp, Almatyny álemdik kınonyń túsirý alańy jasaımyz. Bul tek qalamyzdyń ǵana bedelin kóterip qoımaıdy, sonymen qatar týrızm men shaǵyn jáne orta bıznestiń  damýyna septigin tıgizedi.

Anımasııa óndirisine arnaıy toqtalǵym keledi. Almatynyń anımasııalyq mektebi keńes dáýirinde-aq bıik nátıjelerge qol jetkizdi.

Qazir anımasııa stýdııalary joq esebi, bul da ınvestısııalar úshin qosymsha úlken rezerv. Bizdegi anımatorlar áleýetiniń zor ekendigine senimim mol, endi solardy júzege asyrý qajet.

Ekinshiden, mýzyka.

Almaty – «mýzyka» baǵyty boıynsha IýNESKO-nyń kreatıvti qalalar jelisine kiretin Ortalyq Azııadaǵy jalǵyz qala.

Bizdiń oryndaýshylarymyz ishki jáne syrtqy naryqta suranysqa ıe týyndylar jasaı alatynyn san márte dáleldedi.

Indýstrııa, memleket, bıznes jáne bilim berý ókilderiniń birlesýimen Almatylyq mýzykanttardy qoldaý úshin arnaıy platformalar qurylatyn bolady.

Jasalǵan ónimder – iTunes, yandex, spotify taǵy da basqa zamanaýı sandyq quraldar arqyly taratylatyn bolady.

Úshinshiden, ádebıet.

Búgingi kúni bul ındýstrııa basqalaryna qaraǵanda memlekettik qoldaýdy kóbirek qajet etedi. Eń aldymen, men jas talanttar týraly aıtyp otyrmyn.

Jazýshylar men oqyrmandarǵa qajetti barlyu jaǵdaı jasalady. Almatydaǵy barlyq kitaphanalar jóndelip, qosymsha jańalary salynady.

Ol jerler tek qana kitaphana emes, qoǵamdyq keńistikke aınalady.

Ol kitaphanalarda biz jas qalamgerlerdi óz týyndylaryn iTunes, yandex, bookmate, amazon sekildi sandyq quraldar arqyly tabysty satý jáne ilgeriletý ádisterine úıretetin bolamyz.

Bizde ózindik qoltańbasy bar, mádenı jáne tarıhı muralar ana sútimen daryǵan shynaıy talantty jazýshylar bar. Tıisti qoldaýdyń arqasynda bizdiń jazýshylarymyz dúnıejúzi boıynsha óz oqyrmandaryn tabaryna senimdimin.

Tórtinshiden, teatr,opera, balet.

Klassıkalyq ónerdi damytý men olardy dotasııalaý deńgeıin tómendetý úshin Almatyda arnaıy qalanyń teatr ónerin damytý strategııasy jasalady. Basty maqsat – teatrdy tek qala turǵyndary úshin ǵana emes, jaqyn qalalar men elder úshin de tartymdy etý. Biz teatrǵa barý mádenıetin qaıta jańǵyrtýymyz qajet.

Buǵan biz aýqymdy álemdik deńgeıdegi sahna, opera jáne balet juldyzdaryn tartyp, teatr festıvaldaryn ótkizý arqyly qol jetkizemiz.

Almatynyń mádenı murasy men bilim bazasyn eskersek, qalanyń Ortalyq Azııadaǵy sahna óneriniń ortalyǵy bolýǵa tolyq múmkindigi bar. Osylaısha, ortalyq-azııalyq aımaqtyń túkpir-túkpirinen osy óner túrlerin súıetinderdi tartýǵa bolady.

Álemdik deńgeıdegi shedevrler jasaýǵa qajetti áleýet bizde bar, bizdiń mindetimiz – sonyń tolyq ashylýyna jaǵdaı jasaý.

Besinshiden, dızaın jáne sáýlet.

Almaty – qazaqstandyq sáýletshilerdi daıyndaıtyn eń basty ortalyq.

Almatyda elimiz ben shetelde de tanymal sáýlet jáne dızaın bıýrolary kóptep ashylýda.

Ákimdik Almatynyń biregeı tarıhı ǵımarattary týraly málimetterdi jınaı bastady, sosyn olar tıisti katalogqa engiziletin bolady. Biz Almatydaǵy sáýlet salasynyń tarıhı sabaqtastyǵyn saqtaýymyz kerek.

Biryńǵaı sáýlettik jáne dızaınerlik kodty jasap, qalamyzdaǵy bolashaq obektilerdiń qurylysyna engizemiz. Qazirgi dızaın tarıhı ǵımarattarmen úılesýi tıis. Jańadan salynǵan árbir obekt qalamyzdy tartymdy etip, ereksheleı túsýi qajet.  

 Altynshydan, sán.

Sońǵy jyldary bul sala qarqyndy damyp keledi. Birinshi kezekte, jeke bastamalardyń arqasynda.

Qazaqstandaǵy sán ındýstrııasynyń – áli júzege aspaı kele jatqan úlken múmkindikteri men áleýeti bar. Osy erekshe salany durys damyta bilsek, álemge Uly dala órkenıetiniń dástúrlerine negizdeletin sán ónerin, oǵan degen shynaıy kózqarasymyzdy usyna alarymyz anyq.

Jetekshi sán úıleri men zergerler álem jurtshylyǵyn ata-babalarymyzdyń «ań stılimen», halyqtyń qoldanbaly oıý-órnekterimen shabyttandyratyn bolady.

Almatydaǵy sán kórsetilimderi dástúrli is-sharalar ǵana emes, sondaı-aq sán ındýstrııasynyń problemalaryn talqylap, ony sheshý joldaryn izdestiretin alańǵa aınalýy tıis.

Biz, jumysyn jańa bastaǵan jas dızaınerlerge sheberhanalar usynyp, ónimderin ishki naryqta nasıhattaýǵa kómektesemiz.

Jetinshiden, jańa medıa jáne sıfrlyq mádenıet.

Jańa medıa – bul Almatyda paıda bolyp, qarqyndy damyp kele jatqan ınteraktıvti elektrondyq basylymdar. Onyń damýy áleýmettik jeliler men blog-platformalar tanymaldyǵynyń artýyna da tikeleı serpin berdi.

YouTube, Instagram, Twitter sekildi platformalar tıimdi kontent quryp, jaqsy tabys tabýǵa múmkindik berdi.

Osylaısha, bizdiń jastarymyz úlken jetistikterge qol jetkizip otyr. Olar  Qazaqstanda ǵana emes, sonymen qatar TMD elderinde de birshama tanymal. Mundaı qyzyǵýshylyqqa qoldaý kórsetip, ári qaraı damytýymyz qajet.Almatynyń aýdıovızýaldy kontentiniń damýyn eskere otyryp, bizde búkil Ortalyq Azııany qamtıtyn naryq qalyptastyrýdyń alǵysharttary bar.

Segizinshiden, oıyn-saýyq ındýstrııasy: qoǵamdyq keńistikter, mýzeıler.

Almaty qalasynyń «Kún beldeýi» úlken attraksıondar parkin qurýǵa múmkindik beredi, olar tek Qazaqstan óńirleriniń turǵyndary úshin ǵana emes, sheteldik týrıster úshin de tartylys aımaǵyna  aınalady.

Biz oqıǵaly týrızmdi damytamyz. El ishinde de, shet elden kelgen qonaqtardy da tartatyn konsertter, shoý, festıvaldar, qoıylymdar ótkizý qajet.

Sondaı-aq oıyn túrinde oqytýǵa (edutaintment) negizdelgen nysandardy damytý qajet. Bul mýzeıler, kórmeler jáne basqa da qoǵamdyq keńistik, munda turǵyndar men qonaqtar, ásirese balalar oıyn-saýyq arqyly elimizdiń, qalamyzdyń, ólkemizdiń baı tarıhyn tanıdy. 

Almaty murajaılary ınteraktıvti jáne oıyn-saýyqqa ıkemdi, óskeleń urpaq úshin sıfrlyq ortaǵa beıimdelgen jańasha baǵyttarmen qyzyqty bolýǵa tıis.

Men Almatyda megapolıstiń ǵylymı-aǵartýshylyq jáne kommýnıkatıvtik ortalyǵyna aınalatyn jańa galereıa nemese zamanaýı óner murajaıyn qurýdy usynamyn.