Mınıstr: Bir sheshimge kelgen joqpyz

Eńbek jáne halyqty áleýmettik qorǵaý mınıstri Birjan Nurymbetov zeınetaqy jınaǵyn paıdalaný boıynsha bir sheshimge kele almaýdyń sebebin atady, dep jazady Qamshy.kz aqparat agenttigi. 

"Búginde mınıstrlik pen úkimettiń janynan arnaıy jumys toby qurylǵan. Sol jerde kóptegen usynys qarap jatyrmyz. Bizdiń josparymyz boıynsha aldaǵy jeltoqsan aıynda bir ustanymǵa kelip, jumys tobynyń atynan prezıdentke usynys jasaýymyz kerek. Ázirge, bir sheshimge kelgen joqpyz", – dep mınıstr baspasóz máslıhatynda málim etti..

Nurymbetovtyń aıtýynsha, qazirgi kezde zeınetaqy qorynda 10 mıllıonǵa jýyq esepshot bar. Al salymshylardyń jalpy jınaqtary 10 trıllıon teńgeni qurap otyr.

"Rasynda, eseptep kelgende salymshylardyń 70 prosenti 1 mıllıon teńgege deıin ǵana aqsha jınaǵan bolyp shyǵady. Sondyqtan bul máseleniń qıyndyǵy bar. Al zeınetaqy qoryndaǵy jınalǵan jarnalardyń negizgi maqsaty – bizdiń zeınetaqymyzdy qamtamasyz etý. Negizi, memleket tarapynan tólenetin zeınetaqynyń yntymaqtastyq júıesi jyldan-jylǵa jabylyp keledi. 2040 jyldan keıin tipti memlekettiń tarapynan taǵaıyndalatyn zeınetaqyǵa shyǵatyn adamdar bolmaıdy", – dep Birjan Nurymbetov aıtty.

Eske salsaq, qyrkúıektiń basynda memleket basshysy zeınetaqy jınaqtaryn paıdalanýǵa qatysty tapsyrma bergen bolatyn.

"Úkimetke jyldyń aıaǵyna deıin jumys isteıtin azamattar úshin zeınetaqy jınaqtarynyń bir bóligin maqsatty paıdalaný máselesin pysyqtaýdy tapsyramyn. Máselen, ol aqshany baspanany satyp alýǵa jáne bilim alýǵa jumsaýǵa bolady", – dedi Toqaev.