Almatyda Farıza Ońǵarsynovanyń esimimen atalatyn kóshe ashyldy

Almatyda aqyn, belgili memleket jáne qoǵam qaıratkeri Farıza Ońǵarsynovanyń atyna berilgen kósheniń resmı túrde ashylýy ótti. Poezııa padıshasynyń qurmetine Alataý aýdanyndaǵy uzyndyǵy 4 shaqyrymnan asatyn burynǵy Aqsaı kóshesi berildi.

Sharaǵa aqynnyń jerlesteri, aqyn-jazýshylar men týystary, Almaty qalasy ákimdiginiń ókilderi qatysty. Jınalǵandar F.Ońǵarsynovanyń ómiri men shyǵarmashylyǵy týraly esteliktermen bólisti.

Almaty qalasy ákiminiń keńesshisi Mamaı Ahetov aqynnyń 80 jyldyq mereıtoıyna arnalǵan sharalarǵa toqala kele, Atyraýda alyp eskertkishtiń boı kótergenin, elordada kóshe ashylǵanyn atap ótti.

– Dál sol sekildi mereıli belesine oraı Almaty qalasynda da dál sondaı sharanyń bir kýási bolyp otyrmyz. Osy bir aýyzdan osy Farıza apamyzǵa kóshe beriler kezde bul barlyq deńgeılerde eldiń moıyndaǵandyǵyn kórsetti,  – dedi Mamaı Ahetov.

– Kóshege Farızanyń atyn berý – barsha qazaq qyzdaryna, aqyn qyzdaryna kórsetilgen syı-qurmet. Endi bizdiń aqyndarymyz kóp bolǵanymen, onyń ishinde naǵyz aqyndar saýsaqpen sanarlyqtaı ǵoı. Mine, soǵan qaraǵanda Farızanyń orny erekshe. Aramyzda Farıza joq. Áli kúnge sheıin osy ólimge qımaıtyn adamdaryń bolady ǵoı. Maǵan ol bir telefon soǵatyn sııaqty kórinedi de turady, – dedi jazýshy, dramatýrg Dýlat Isabekov.