«Almaty – 2050» strategııasy qalany qaýipsiz de qolaıly, zamanǵa saı megapolıske aınaldyrýdy kózdeıdi

«Almaty – 2050» damý strategııasy eki mıllıonǵa jýyq turǵyny bar Almatynyń qarapaıym adamdarynyń kúnbe-kúngi máselelerin sheshýge baǵyttalǵan.

Strategııada kóterilgen 7 basymdyq almatylyqtardyń óómir sapasyn jaqsartýǵa septigin tıgizeri sózsiz. Baǵdarlamalyq qujatta aıtylǵan mindetterdiń tolyqtaı iske asýyna megapolıstiń múmkindigi jetedi.

Tek, aırandaı uıyǵan berekemizdi saqtap, burynǵydan da yntymaqtasa túsýimiz, el bolyp eńbek etýimiz kerek. Almaty halqynyń sany kún sanap, jyl sanap artyp keledi. Buryn-sońdy bos jatqan jerler áp-sátte kishigirim eldi-mekenge aınaldy. Nátıjesinde Almatynyń shekaralyq aımaǵy da keńı tústi. Shaharymyzdyń shekarasy ulǵaıdy. Búginde Almatyda segiz aýdan bar. Ár aýdan – megapolıstiń aınasyna aınalýy tıis. Ol úshin strategııadaǵy «Shetsiz qala» tujyrymdamasy megapolıstegi ár aýdannyń ortalyqtandyrylyp, mańaıy qajetti ınfraqurylymdarǵa qoljetimdi bolýyn mindetteıdi. Budan ózge, kez kelgen qalanyń kelbeti tek qana bıik, záýlim ári ádemi úılermen ólshenbeıdi. Eldi-mekenniń kórkine onyń jasyl jelegi men tazalyǵy úlken úles qosady. Strategııadaǵy «Jasyl qala» baǵyty boıynsha qorshaǵan ortaǵa keltiretin zııandy zattardy azaıtyp, kóptep jasyl jelek egý josparlanǵan.

Aldaǵy úsh jylda Almatyda 1 mıllıon túp aǵash otyrǵyzý mindeti qoıyldy. Sonymen qatar, demalys oryndary men saıabaqtarda da kógaldandyrý jumystary qarqyndy júrgizilýde. Máselen, Efıopııada 12 saǵattyń ishinde 350 mln. aǵash otyrǵyzylypty. Múmkin úsh jylǵa josparlanǵan 1 mıllıon aǵashty bir jyldyń ishinde otyrǵyzyp tastaımyz ba eken, kim bilsin?! Negizi bul qujattyń maqsaty – Almatyny ár turǵyny berekeli ómir súretin, qaýipsiz de qolaıly, zamanǵa saı megapolıske aınaldyrý. Biz oǵan tek birge, tize qosyp eńbek etý arqyly jete alamyz. «Eldiń kúshi – seldiń kúshi» demekshi, qalany, ondaǵy aýdandardy kórkeıtý úshin turǵylypty halyqtyń qoldaýy qajet.

Bolat OSPANOV,

qalalyq máslıhattyń depýtaty