«Nur Otan» partııasynda elimizdiń shalǵaı aýdandary men aýyldarynyń damýy talqylandy

Elimizdiń árbir aımaǵy, eń shalǵaı aýdandary men aýyldaryn damytýdyń ózekti máselelerin talqylaý úshin «Nur Otan» elordada barlyq aımaqtyq fılıal ókilderin jınady. Prezıdent Ákimshiliginiń, Úkimet pen «Nur Otan» partııasynyń basshylyǵy partııa múshelerine memlekettik saıasatty damytýdyń negizgi baǵyttary, Saılaýaldy baǵdarlamany júzege asyrý jáne eldiń jetekshi saıası kúshiniń jumysyn qaıta jańǵyrtý boıynsha qabyldanǵan sharalar týraly aıtyp berdi. Partııalyqtar úshin alǵash ret arnaıy oqý-jattyǵý tobynyń otyrysy uıymdastyryldy.

«Nur Otan» partııasynyń Lıderi Nursultan Nazarbaev partııanyń múshelerin toptastyrý jáne qatarymyzǵa basqa da belsendi azamattardy tartý mindetin qoıǵanyn bilesizder. Partııanyń óz ishindegi demokratııany damytýǵa da erekshe kóńil bólindi. 14 óńirde partııanyń kadrlyq rezervine irikteý boıynsha pılottyq joba júrgizildi. Memleket basshysy Qasym-Jomart Toqaevtyń tapsyrmasymen Úkimet óńirlerdi damytýǵa qomaqty qarajat bóledi. Partııanyń mindeti – jergilikti jerlerde qarajattyń tıimdi jumsalýyna qatysty jurtshylyqty habardar ete otyryp, halyqtyń ómir súrý sapasyna tikeleı áser etetin jobalardyń iske asyrylýyna qoǵamdyq jáne partııalyq baqylaýdy uıymdastyrý», - dedi óz sózinde «Nur Otan» partııasy Tóraǵasynyń birinshi orynbasary Baýyrjan Baıbek.
Aldaǵy jyly elimizdiń aqparattyq-saıası kún tártibinde turǵan negizgi baǵyttar týraly Prezıdent Ákimshiligi basshysynyń birinshi orynbasary Darhan Káletaev aıtty.

«Keler jylǵa arnalǵan ıdeologııalyq mindetterdiń negizgi bóligi – «Halyq únine qulaq asatyn memleket» tujyrymdamasyn iske asyrý, Ulttyq qoǵamdyq senim keńesiniń qyzmeti, adam quqyqtary salasynda reformalar men is-sharalar ázirleý, sonymen qatar 2025 jylǵa deıingi azamattyq qoǵamdy damytýdyń orta merzimdi tujyrymdamasyn qabyldaý. Osy atalǵandardyń barlyǵy partııaishilik alańdarda tolyqqandy talqylanyp, olar boıynsha egjeı-tegjeıli usynystar daıyndaý kerek dep esepteımin» - dep atap ótti Darhan Káletaev partııa múshelerimen kezdesýde.
Premer-Mınıstrdiń birinshi orynbasary Álıhan Smaıylov óz sózin Elbasynyń strategııalyq bastamalaryn iske asyrý men Memleket basshysynyń qazaqstandyqtardyń turmysy men ál-aýqatyn jaqsartýǵa baǵyttalǵan tapsyrmalaryna arnady. Úkimet qalalardyń shet aımaqtaryn men ınjenerlik ınfraqurylymdy damytýǵa jáne jańa tehnologııalardy engizýge bólinetin qarjyny kóbeıtýdi kózdep otyr. 2024 jylǵa qaraı aımaqtardy damytýdyń jańa standartyna sáıkes, 3477 aýyldy aýyz sýmen qamtamasyz etý, joldaryn jóndeý, áleýmettik nysandar salý arqyly jańartý josparlanǵan.

Premer-Mınıstrdiń orynbasary Berdibek Saparbaevtyń aıtýynsha, qala men aýyldyń bilim berýdegi, sporttyq qurylystardyń qol jetimdiligindegi alshaqtyqty joıý boıynsha jumystar jalǵasýda.
Densaýlyq saqtaý mekemelerin medısınalyq tehnıkamen jabdyqtaý deńgeıin 70%-ǵa jáne odan da joǵary deńgeıge jetkizý josparlanǵan. 2020 jyly muǵalimderdiń jalaqysy 25%-ǵa, mádenıet, óner jáne muraǵat qyzmetkerleriniki ortasha eseppen 30%-ǵa kóterý kózdelýde. Al dárigerlerdiń eńbekaqysyn 30%, medbıkelerge 20%-ǵa kóbeıtiledi dep kútilip otyr.

О́z kezeginde vıse-premer Roman Sklıar partııa múshelerimen kezdesýde jergilikti mańyzy bar avtokólik joldaryn jóndeý, shalǵaıdaǵy eldi mekender men aýyldardy sýmen jabdyqtaý josparlaryna jeke-jeke toqtaldy.