Qazaqstandyq sheberler Italııada «Trýbadýr» operasyna kostıýmder ázirledi

Italııanyń Genýıa qalasyndaǵy Karlo Felıche teatrynda «Trýbadýr» qoıylymy 2019-2020 jylǵa arnalǵan opera jáne balet maýsymyn ashty. Dál osy qoıylym 1991 jyly 18 qazanda tolyqtaı qalypqa keltirilgen jańa Karlo Felıche teatrynda da alǵashqy maýsymdy ashyp, qonaqtar qabyldaǵan edi. Genýıa jurtshylyǵy úshin «Trýbadýr» - jandanýdyń nyshany.

Mine araǵa 28 jyl salyp, tanymal Verdıana trılogııasy (La Travıata, Rıgoletto, Trýbadýr) Qazaq ǵylymı-zertteý mádenıet ınstıtýty ótken jyly tańdaǵan, Qazaqstannyń eń úzdik 50 sýretshisiniń qataryna engen otandastarymyzdyń qatysýymen tipten qulpyra tústi.

«Bizdiń basty maqsatymyz áıgili lıbrettonyń opera rýhyn, atmosferasyn jetkizý boldy. Eń aldymen, biz kompozıtor Verdıdiń óz shyǵarmasynda aıtqysy kelgenin túısinip, pash etkimiz keldi. Qazan aıynda bizde taǵy da Verdıdiń «Don Karlos» operasy boldy. Bul jumys osylaısha «Trýbadýrǵa» jalǵasty. Sóıtip, bizde Verdıdiń operalyq kúıinen shyǵýǵa tipti ýaqyt ta bolmady», - dedi sahna dızaıneri jáne kostıýmder boıynsha sýrteshi Sofıa Tasmaǵambetova.
Sofııa úshin bul Italııadaǵy alǵashqy qoıylym jumysy. Sýretshi Genýıada bolǵanyna óte qýanyshty ekenin jasyrmaıdy. Ol daıyndyq prosesiniń kúrdeliligi rejısserge baılanysty ekenin, qoıylymǵa Verdıdiń barlyq derlik shyǵarmalarymen tanys Marına Bıankı qatysqandyqtan jumys isteý jeńil bolǵanyn aıtady.

«Teatrda arnaıy jabdyq – aınalatyn sheńber bar. Ústinde dekorasııa qoıylǵan, bul dekorasııa spektakl boıynsha aınalady. Sahna ózgerisi kórermenniń kóz aldynda júzege asady, bul dál osy opera úshin óte mańyzdy, óıtkeni kidirtý múmkin emes. Ol úshin jaı mýzyka joq. Sol sebepti biz dál osyndaı tásildi tańdadyq», - dep óz qupııasymen bólisti sahna bezendirýshi, kostıýmder boıynsha sýrteshi Pavel Dragýnov.

Sofıa Tasmaǵambetova men Pavel Dragýnov uzaq ýaqyttan beri ózderiniń jeke shyǵarmashylyq tandemin quryp, dekorasııadan bastap kostıýmderge deıin spektaklderdiń tolyq sahnalyq dızaınyn jasaıdy. Pavel erler kostıýmderin ázirlese, Sofııa – áıelderdiń kıimin daıyndaıdy. Shyǵarmanyń mazmunymen tanysqannan keıin ssenograftar eskızder, rekvızıt, býtaforııa, kostıýmder ázirleýge kirisip, ár keıipkerdiń sıpatyna qaraı aksessýarlaryn jeke-jeke táptishtep sýretin salyp, daıyndaıdy.
«Sahna jaı ǵana kisi nanǵysyz. Úılesimdi dekorasııanyń aınalýy, barlyq qural-jabdyqtar men jaryqtyń ózgerýi, operanyń ózi, mýzyka qarapaıym emes. Maǵan shynymen de qatty unady», - deıdi qoıylymnan keıin kórermen Karlo Barbıerı.
Genýıadaǵy basty opera teatry Karlo Felıchedegi «Trýbadýr» qoıylymyna 2000 orynǵa túgel kórermen lyq toldy. Karlo-Felıche teatry - Italııadaǵy iri opera úıi, ol opera men balet spektaklderin de, aýqymdy konsertterdi de qabyldaıdy. Ǵımarattyń alǵashqy tasy 1826 jyly naýryzda qalanǵan.

Nurǵalı Nurtaı