Alataý aýdanyndaǵy jer telimderi máselesiniń basymy sheshimin tapty

Almaty qalasynyń ákimi Baqytjan Saǵyntaev 22 qarasha kúni Alataý aýdany turǵyndarymen ekinshi márte kezdesti. Bul – aýdan turǵyndarymen osy jyldaǵy ekinshi kezdesý, dep jazady ákimdiktiń baspasóz qyzmeti.

Buǵan deıin, 9 tamyzda «Erkin mıkrofon» formatyndaǵy alǵashqy kezdesý ótken bolatyn. ol kezde 500-den astam adam jazbasha jáne 400-den astam adam aýyzsha suraq qoıǵan edi. Suraqtardyń bir bóligi sol jerde sheshimin tapty, qalǵandaryna jiti saraptama jasaldy, onyń qorytyndysy boıynsha qalanyń túrli basqarmalary men qyzmetterine jáne aýdan ákimdigine 161 tapsyrma berildi.

Aýdandaǵy eń ózekti máseleniń biri – jer telimderin zańdastyrý boıynsha 930 problemalyq ýchaskeniń 724-in rásimdeý jóninde naqtyly sharalar júzege asty. Qalǵandary boıynsha qosymsha jumystar júrýde, óıtkeni olardyń keıbireýi sý qorǵalatyn aımaqqa, kóshelerdiń «qyzyl jıegine», elektr ótkizgish jelilerdiń qorǵalatyn aýmaqtaryna ornalasqan.

Sondaı-aq Baqytjan Saǵyntaev «Jańa Almaty» besjyldyq jocpary aıasynda aýdandy damytý sharalary týraly habarlady.

Kommýnaldyq másele boıynsha shildeden bastap 315 úı bar «Rahat-Mádenıet» yqshamaýdanynda uzyndyǵy 2,65 km bolatyn gaz qubyrynyń qurylysy júrýde. Gaz qubyry iske qosylǵanda «Teploenergetık» jáne «Energostroıtel» baý-baqsha qaýymdastyǵynyń taǵy 298 úıi gazben qamtamasyz etiledi. Jalpy, aǵymdaǵy jyldyń aıaǵyna deıin Alataý aýdanynda 4,15 km gaz jelisin tartý josparlanýda.

Sonymen qatar «Áıgerim», «О́jet», «14-shi aýmaq», «Aqbulaq» (aıaqtalyp qaldy), «Shańyraq-5», «Samǵaý», «Kók-Qaınar», «Shapaǵat», «Alǵabas» sekeldi toǵyz yqshamaýdanda uzyndyǵy 291 km bolatyn ınjenerlik jeli qurylysy jalǵasýda. Jáne 156,6 km sý qubyry, 134,5 km káriz jelisi tarttylýda. Atalǵan jeliler iske qosylǵanda Alataý aýdanynyń turǵyndarynnyń 85 paıyzdan astamy aýyz sýmen qamtylmaq.