• USD 389.52
  • EUR 429.21
  • RUB 6.07
  • CNY 54.94
28 Qańtar, 14:45:04
Qazaqstan Ýkraınanyń saýda naryǵyna alańdaýly

20 Qarasha, 2019 NEWS

Termınologııalyq jumys tobynyń otyrysy ótti

Qazaqstan Respýblıkasy Mádenıet jáne sport mınıstrliginiń Til
saıasaty komıtetiniń tapsyrmasymen Sh.Shaıahmetov atyndaǵy «Til-Qazyna»
ulttyq ǵylymı-praktıkalyq ortalyǵy Nur-Sultan qalasynda 2019 jylǵy
20 qarashada Qazaq tili álipbıin latyn grafıkasyna kóshirý jónindegi
Ulttyq komıssııa janyndaǵy Termınologııalyq jumys tobynyń «Jańa
álipbıge kóshý jaǵdaıyndaǵy salalyq termınderdi ıgerý máselesi»
taqyrybyndaǵy otyrysy ótti.


Ulttyq álipbıdi qabyldaý barysyndaǵy termınderdi qalyptastyrý
boıynsha ótkizgen otyrysta Mádenıet jáne sport vıse mınıstri N.Dáýeshov
sóz alyp, Termınologııalyq jumys tobynyń jumysyn uıymdastyrý osy
jyly Bilim jáne ǵylym mınıstrliginen Mádenıet jáne sport mınıstrligine
aýystyrylǵanyn tilge tıek etti. Ol búgingi otyrystyń maqsaty –
termınologııalyq jumys toby múshelerin qazaq tili álipbıin latyn
grafıkasyna 2025 jylǵa deıin kezeń-kezeńimen kóshirý barysynda kezdesetin
máselelerdi tıimdi sheshýge jumyldyrý, sony der kezinde belgilep, anyqtap
otyrý, termınologııany jańa kezeńge sáıkes jandandyrý joldaryn
qarastyrýdy da atap aıtty. Sonymen qatar, aldymyzda termınologııalyq
sózdikterdi ázirleý, latyn grafıkasy negizinde termınologııanyń ǵylymı
negizderin ázirleý, termınologııalyq bazany tolyqtyrý jáne de basqa
jumystardyń turǵanyn alǵa tartty.


Budan keıin ǵalymdar kóterilip otyrǵan másele boıynsha óz oılaryn
ortaǵa saldy. Olardyń qatarynda: A.Fazyljanova, S.Qulmanov,
Q.Aıdarbek O.Jubaeva, S.Iteǵulova t.b. bar.


Otyrysta atalǵan másele boıynsha professorlar Sh.Qurmanbaıuly
qazaq termınderin latyn álipbıine kóshý kezinde A.Baıtursynuly
prınsıpine júginý, qandaı termınderdi aýdaramyz, qandaı termınderdi óz
qalpynda alamyz degen máseleni qozǵasa, B.Ábdýálı termın jasaý kezindegi
alqaly jıyndarǵa joǵary oqý oryndarynda qyzmet etip júrgen
ǵalymdardy da qosý kerektigin tilge tıek etti.


Bul otyrysty «Til-Qazyna» ulttyq ortalyǵynyń bas dırektory
Á.Asqar úılestirse, Mádenıet jáne sport mınıstrligi Til saıasaty
komıtetiniń tóraǵasy Ǵ.Meldesh qorytyndylady.

 

Sh.Shaıahmetov atyndaǵy «Til-Qazyna»
ulttyq ǵylymı-praktıkalyq ortalyǵy

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir