Depýtat: Qoǵamnyń esi durys emes...

QR Parlamenti Májilisiniń depýtaty Qýanysh Sultanov «Qazaqstan Respýblıkasynyń keıbir zańnamalyq aktilerine qylmystyq jáne qylmystyq-prosestik zańnamany jetildirý máseleleri boıynsha ózgerister men tolyqtyrýlar engizý týraly» zań jobasyn qoldaıtynyn jetkizip, urlyq máselesine qatysty pikir bildirdi dep jazady Qamshy.kz aqparat agenttigi baq.kz saıtynyń deregin negizge alyp. 

"Qoǵamnyń densaýlyǵy durys emesteı kórinedi. Esi durys adam nárestege zorlyq jasaı ma, esi durys adam osy qoǵamda qalaı mekteptiń aýlasyna kirip ketedi? Osy jaǵdaılardan bizdiń salǵyrttyǵymyz, qoǵamnyń salǵyrttyǵy kórinedi. Osyǵan baılanysty quqyq qorǵaý organdarynyń quqyqtaryn kúsheıtip, olarǵa múmkindikter berip otyrmyz. Ekinshi jaǵynan quqyq qorǵaý organdarynyń jaýapkershiligin kúsheıtý kerek", - dedi depýtat.

Sultanov urlyq qylmystarynyń ashylmaýyna quqyq qorǵaý organdarynyń da áseri baryn aıta ketti.

"Qoǵamnyń deni saý bolmaǵan soń urlyq jasaıdy. Nege balalarymyz urlyqqa beıimdeledi? Sodan baryp úıir-úıir jylqy urlaýǵa deıin ósedi. Muny quqyq qorǵaý organdarynyń basshylary ózderi aıtyp otyr, biledi. Narkoturaq qaıda ekenin biledi, maldy urlap, ony Qostanaıdan Qyrǵyzstanǵa, Qyrǵyzstannan Qostanaıǵa aıdaıtyn joldardyń bárin biledi. Nege jabylmaıdy osynyń bári? Osyǵan degen kózqarasty ózgertip, zańnyń jumys isteýin qamtamasyz etýimiz kerek. Jalpy, saýatty jáne órkenıet talaptaryna saı zańdarymyz bar, biraq, oryndaýǵa kelgen kezde typyrlaımyz da qalamyz. Sońynda Parlament kináli bolyp shyǵady", - dedi ol.

Parlament Májilisiniń depýtaty urlyq máselesine jalpy qoǵam jaýapkershilikpen qaraýy tıis ekenin aıtty. 

"Búkil qoǵam osyǵan qarsy óre túregelmesek, urlyqty toqtata almaımyz. Mal urlady ma, úırek urlady ma, qaz urlady ma, urlyq degen óte jaman minezdeme. Qoǵamnyń aýrýy, derti degen sóz. Quqyq qorǵaý organdarynyń qyzmetkerleri «zańnyń mynadaı baby bar, osydan saq bolyńdar» dep teledıdardan kúnde sóılesin. "Urlyqqa barmańdar, 20 jyl tutqynda otyrasyńdar" dep aldyn ala eskerteıik. Qoǵamnyń qulaǵyna kirgizý máselelerin qolǵa alýymyz kerek", - dedi depýtat.

Sultanov buryndary kámeletke tolmaǵandar isi boıynsha komıssııalar bolǵanyn, osy jumystardy da qaıta jańartý qajet ekenin aıtty.