«Almaty Invest» halyqaralyq ınvestısııalyq forýmy ótedi

Almatyda 27 qarasha kúni «Almaty Invest 2019» halyqaralyq ınvestısııalyq forým ótedi, dep habarlaıdy ákimdiktiń baspasóz qyzmeti.

Sharanyń taqyryby Qazaqstannyń ońtústik astanasynyń ınvestısııalyq tartymdylyǵyn arttyrý. 7 paneldik sessııadaǵy pikirtalastarǵa 500-den astam adam qatysady. Onyń ishinde iri álemdik jáne qazaqstandyq kompanııalardyń, QR mınıstrlikteriniń, qarjy ınstıtýttarynyń basshylary jáne halyqaralyq uıymdardyń ókilderi bar.

– Forýmnyń maqsaty – bıznesti damytýdy yntalandyrý, Almatyǵa sheteldik ınvestorlardy tartý jáne jańa jumys oryndaryn ashý bolyp tabylady. Almaty shetelden kelgen ınvestorlar úshin eń tartymdy óńirlerdiń biri boldy jáne bolyp qala beredi. Almaty Investment Forum-bul Almaty kásipkerleri men áleýetti ınvestorlar arasynda dıalog ornatýǵa, qyzyqtyratyn suraqtar men qoıylǵan mindetterdi sheshý joldaryn talqylaýǵa múmkindik beretin alań, – deıdi forým uıymdastyrýshylary.

Jańa Jibek joly boıyndaǵy kólik-logıstıkalyq ortalyq retinde pozısııasyn kúsheıtýi tıis Almatynyń ınfraqurylymdyq damýy da jıynda sóz bolatyn keleli máselelerdiń biri. Almaty Investment Forum 2019 sessııalary aıasynda Almatynyń jańa halyqaralyq týrızm ortalyǵy retinde tusaýkeseri josparlanǵan. IT-bıznes kapıtandary men sarapshylar Almatydaǵy startaptar men ınnovasııalardyń bolashaq ósý sektorlaryn talqylaıdy. Forým sessııalarynda bedeldi saıasatkerler, belgili ekonomıster men qarjygerler, álemdik startap-jobalardyń negizin qalaýshylar jáne jergilikti Think tank ókilderi sóz sóıleıdi. Almaty Investment Forum 2019 hedlaınerleri: Túrkııanyń burynǵy vıse-premeri Mehmet Shımshek, McKinsey jahandyq ınstıtýtynyń basshysy Djonatan Votsel, TiE Global qaýymdastyǵynyń prezıdenti Sharma Mahavır Pratar, ortalyq jáne Shyǵys Eýropa, Ortalyq Azııa elderi boıynsha Nokia vıse-prezıdenti Mıkko Lavantı, Katar Saýda-О́nerkásip palatasynyń vıse-prezıdenti Mohammed Bın Taýar Al-Kavarı, sondaı-aq jetekshi qazaqstandyq kompanııalardyń top-menedjerleri.