Jarqyn jobanyń jemisi mol bolmaq

Aýyl sharýashylyǵy – el ekonomıkasynyń ózegi ekendigi aqıqat. Sondyqtan da bolar, Memleket basshysy Q.Toqaev Qazaqstan halqyna alǵashqy Joldaýynda osy salany damytýǵa aıryqsha nazar aýdardy. Osy oraıda oblys ákimi Asqar Myrzahmetov aýyl turǵyndarynyń turmystyq tabysyn jaqsartý maqsatynda aımaqta pılottyq jobany iske qosqan bolatyn. Úkimet qoldaý bildirgen pılottyq bastama aıasynda qazir aýdandardaǵy belgilengen eldi mekenderde tirshilik qyza tústi. Atalǵan joba boıynsha Talas aýdanynan Úsharal aýyly tańdalynyp alynǵan. Aýdan ortalyǵy Qarataý qalasynan soltústikke qaraı 76 shaqyrym jerde ornalasqan aýyldyń negizgi sharýashylyǵy – mal sharýashylyǵy. Irgesi 1930 jyly asyl tuqymdy qarakól qoıyn ósiretin «Talas» keńsharynyń ortalyǵy retinde qalanǵan aýyldyq okrýgte Aral, Qaıyr eldi mekenderi ornalasqan.

Atalǵan úsh eldi mekende 326 aýlada 2207 adam turady eken. Okrýgtegi bul 326 aýlanyń úı irgesindegi jer kólemi 44,17 gektar. Onyń ishinde tolyq sýmen qamtylǵany 22,34 gektar bolsa, 21,8 gektary sýdyń joqtyǵynan paıdalanýsyz jatyr. Osy oraıda jobanyń alǵashqy baǵyty boıynsha 270 aýla ıeleri baqshasyna kókónis túrlerin ósirýge ótinim bergen. Qarbyz ben qaýyn egip, tabysqa kenelsek deýshiler de joq emes.

Sondaı-aq atalmysh aýylda mal sharýashylyǵy boıynsha da tórt túligin eselep, ónimdilikti arttyrýǵa nıettenip otyrǵandar az barshylyq. Olardyń sany – 170 aýla. Búginde bul baǵytta «Taraz» áleýmettik kásipkerlik korporasııasyna ótinimderi jiberilip, onyń qujattary qabyldaný ústinde. Osyǵan deıin atalǵan aýylda is-saparmen bolǵan óńir basshysy, jobanyń ekinshi baǵyty – mal sharýashylyǵymen aınalysam deýshilerdiń qarasy qalyń ekendigin tilge tıek etip, ata-kásipti jandandyryp, turmysyn túzegisi keletinderdiń salyn sýǵa ketirmeýge asa kóńil bólgen bolatyn. Sondaı-aq túgel bir baǵytta emes, qosalqy sharýashylyqty jan-jaqty tabys kózine aınaldyrý kerektigin eskertip ketken-tin.

– Bul pılottyq joba óńirdegi on aýylda jemisti júzege assa, oblystyń barlyq okrýgterinde, odan keıin el kóleminde qolǵa alynbaq. Sondyqtan bizge júktelip otyrǵan jaýapkershilik zor. Turǵyndar da óz kezeginde jobanyń aýyl bolashaǵy úshin baıandy bastama bolyp otyrǵanyn aıtyp otyr. Olardyń arasynda búginde qosalqy sharýashylyqty tıimdi tabys kózine aınaldyryp, baqshasynan jylyna eki márte ónim alyp otyrǵan tájirıbesin ózgelermen bólisýge daıyn ekendikterin bildirip jatqandar da kezdesedi. Jurtshylyq búginde jobanyń barysyn jete túsinip, áý bastaǵy kúdikten tolyqtaı arylǵan, – deıdi aýyl ákimi Rahymjan Aıtýov.