Talasta tórt túlik sany eselep artady

Memleket basshysy Qasym-Jomart Toqaev Qazaqstan halqyna Joldaýynda aıqyndap bergen mańyzdy mindetterge sáıkes, Jambyl oblysynda agroónerkásip keshenin damytý isi qarqyn ala bastady. Aımaqta memleket qoldaýynyń nátıjesinde óz isin dóńgelentip otyrǵan sharýalar az emes. Solardyń qatarynda Talas aýdanyndaǵy Úsharal aýyldyq okrýgi eńbekkerleriniń de tyndyrymdy tirligi týraly aýyz toltyryp aıtýǵa bolady.

Jalpy atalǵan aýyldyń tórt túlikti túletýge yńǵaıly jer ekeni beseneden belgili. Olaı deıtinimiz, aýyl irgesi 1930 jyly asyl tuqymdy qarakól qoıyn ósiretin «Talas» keńsharynyń ortalyǵy retinde qalanǵan. Sol ýaqyttan beri ata kásipke adaldyq tanytyp kele jatqan búgingi halyq mal sharýashylyǵynan aınyǵan emes. Bul oraıda, «Jambyl oblysy turǵyndarynyń turmystyq tabysyn arttyrý» jobasynyń ekinshi baǵyty boıynsha aýyldyq okýrgte 170 adam nıet tanytyp otyr eken. Atalǵan baǵyt aıasynda mal ósirýge jáne bordaqylaýǵa múmkindikter qarastyrylǵan. Degenmen úsharaldyqtardyń barlyǵy tórt túlikti ósirýge bet buryp otyrǵan kórinedi. Negizinen jobadaǵy kórsetilgen erejeler boıynsha bir qolǵa 5 sıyr, 10 jylqy, 15 buqashyq qana alýǵa bolady. Qazirgi tańda nıet bildirýshi 170 azamattyń qujattary «Taraz» áleýmettik kásipkerlik korporasııasyna jiberilipti. Aldaǵy ýaqytta korporasııa tarapynan qarjy bólinetin bolsa, turǵyndar qorasyndaǵy túlik sanyp arttyryp, tóskeıdi malǵa toltyrmaq. Ol úshin aýylda jaıylym jer de jetedi eken.

– Rasynda, egin sharýashylyǵymen qatar mal sharýashylyǵyn damytý úshin de sýarmaly jer qajet ekeni belgili. Shyndyǵyn aıtar bolsaq, bizde sý tapshylyǵy seziletindikten jobanyń úshinshi baǵyty boıynsha aýyl syrtyndyǵy jerlerdi paıdalana almaımyz. Bul olqylyqtyń ornyn toltyrý maqsatynda biz osy aýdandaǵy Qarataý aýyldyq okrýgine qarasty Qarataý jotasynan 500 gektar tálimdi jerdi sondaǵy sharýa qojalyqtarymen kelisip, aldyq. Ol jerge aldaǵy kóktemde arpa egý josparymyzda. Aıta keterligi, ol sýarylmaıtyn jer. Osylaısha, aýyldy arzandatylǵan jemshóppen qamtamasyz etilmek. Degenmen 500 gektar jerden alynatyn jemshóp arqyly aýyldyq okrýgti tolyqtaı qamtý múmkin emes. Keler jyly bir ret ónim alatyn bolsaq, odan keıingi josparymyzda – egin egiletin jerdiń kólemin ulǵaıtý. Aıta keterligi, atalǵan aýylda sýarmaly jer joq emes, bar. Biraq lotoktary qırap, magıstraldi kanaldary isten shyqqan. Ony retke keltirgen kúnniń ózinde Talastyń joǵary saǵasynan mardymdy sý kele qoımaıdy, – deıdi Talas aýdandyq aýyl sharýashylyǵy bóliminiń basshysy Aýdanbek Erýbaı.