Bıyl Jambylda agrosektorǵa 30,4 mıllıard teńge bólingen

Halyqtyń ál-aýqaty men ómir sapasynyń jaqsy bolýy aýyl sharýashylyǵynyń damýymen tyǵyz baılanysty. Sondyqtan da aýyl sharýashylyǵy – el ekonomıkasynyń sátti damýyna erekshe serpin berip otyrǵan negizgi draıverlerdiń biri ekendigi daýsyz. Memleket basshysy Qasym-Jomart Toqaevtyń «Syndarly qoǵamdyq dıalog-Qazaqstan turaqtylyǵy men órkendeýiniń negizi» atty Joldaýynda da agrosektordy damytý máselesine aıryqsha mán berýi tegin emes.

Al aýyl sharýashylyǵyn damytý – el ekonomıkasynyń, turǵyndardyń ál-aýqatyn arttyrýda óziniń zor úlesin qosýda.

Bıylǵy jyly Jambyl oblysynyń aýyl sharýashylyǵy salasyn damytýǵa 30,4 mıllıard teńge bólindi, bul 2017 jylmen salystyrǵanda 14,9 mıllıard teńgege artty.

Jalpy respýblıka boıynsha, onyń ishinde Jambyl óńirinde de aýyl sharýashylyǵy salasy qarqyndy damýda. Aımaqta aǵymdaǵy jyly 10 aıda 275,6 mıllıard teńgeniń aýyl sharýashylyǵy ónimi óndirilip, ótken jylmen salystyrǵanda ósim 104,4 paıyzdy qurady. Bul respýblıka boıynsha eń joǵary kórsetkish.

Memlekettik baǵdarlamalardyń sátti júzege asýy nátıjesinde oblystyń óndiristik kórsetkishterinde turaqty ósim qalyptasty, aýyl halqynyń turmys deńgeıi kóterilip keledi.

Atalǵan jumysta sala qyzmetkerleri – aýyl sharýashylyǵy eńbekkerleriniń eńbekteri orasan zor.

Jambyl óńiri aýyl sharýashylyǵyn júrgizýge óte qolaıly aımaq ekeni belgili. Áýlıeatalyq sharýalardyń aǵymdaǵy jyly mol ónim alǵanyn da maqtanyshpen aıta alamyz.

Bıylǵy jyly 333,5 myń gektar dándi jáne dándi burshaqty daqyldar egin oraǵyna túsip, ár gektardan alynǵan ortasha ónim 25,0 sentnerdi qurady jáne 763,2 myń tonna astyq bastyrylyp, 92,2 myń tonna ónim artyq alyndy.

Sondaı-aq, oblys sharýalary 270,5 myń tonna kartop, 1 034,6 myń tonna kókónis jınady. 48,5 myń tonnadan astam maıly daqyl ónimderi el yryzdyǵyna aınaldy.

Mine, osylaısha qasıetti Áýlıeata óńirinde agroónerkásip keshenin damytý baǵytynda atqarylǵan júıeli jumystar jemisti nátıjesin berýde. Bul, árıne, úlken sharýalardyń naqty nátıjesi. Eń bastysy eńbek adamdaryna memleket barapynan laıyqty qoldaý kórsetilýde. Qoldaý bar jerde qozǵalystyń bolatyny aıtpasa da túsinikti. Aýqymdy jumystar aldaǵy ýaqytta da jalǵasyn taba beretin bolady.