Úsharaldyqtardyń úmiti zor

«Aýyl sharýashylyǵy – bizdiń negizgi resýrsymyz, biraq onyń áleýeti tolyq paıdalanylmaı otyr.

El ishinde ǵana emes, shetelde de suranysqa ıe organıkalyq jáne ekologııalyq taza ónim óndirý úshin zor múmkindikter bar.

Biz sýarmaly jer kólemin kezeń-kezeńmen 2030 jylǵa qaraı 3 mıllıon gektarǵa deıin ulǵaıtýymyz kerek.

Bul aýyl sharýashylyǵy óniminiń kólemin 4,5 ese arttyrýǵa múmkindik beredi.

Saýda jáne ıntegrasııa, aýyl sharýashylyǵy mınıstrlikteri fermerlerge óz ónimin syrtqa shyǵaryp satý úshin barynsha qoldaý kórsetýi tıis.

Osyǵan oraı Úkimetke tıisti tapsyrma berildi. Bul – mańyzdy mindet,

Aýyl sharýashylyǵy ónimin eksporttaý isinde shıkizatqa negizdelýden bas tartý kerek». Memleket basshysy Qasym-Jomart Toqaev «Syndarly qoǵamdyq dıalog-Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda osylaı dep atap kórsetip, agroónerkásip keshenin damytý máselesinen basa nazar aýdarǵan bolatyn.

Búginde Jambyl oblysyndaǵy árbir eldi mekende aýyl sharýashylyǵyn damytýǵa arnalǵan jobalar júzege asýda. Ásirese, Jambyl oblysy turǵyndarynyń turmystyń tabysyn arttyrý jobasynyń bereri mol bolmaq. Baıandy bastamaǵa ún qosqan eldi mekenniń biri-Talas aýdanyndaǵy Úsharal aýyldyq okrýgi.

Aýyl ákimi Rahymjan Aıtýovtyń sózinshe, okrýgte basty problema aǵyndy sý eken. Sondyqtan ondaǵy turǵyndar jobanyń alǵashqy baǵyty boıynsha asa qulshynys tanyta qoımapty. О́ıtkeni, egin egýde sý tapshylyǵy adym attap bastyrmaıtyn kórinedi. Máselen, ótken jyly úsharaldyqtar «Jeti ǵasyr» egistigine egin ekkenimen óndirip ónim ala almaǵan. Saıyp kelgende sýǵa toımaǵan kókónis sharýalardy shyǵynǵa batyryp, tyǵyryqqa tirepti. Onda sý barmaýynyń sebebi de belgili. Talas ózeniniń joǵary saǵasynda ornalasqan Baızaq, Jambyl aýdandarynyń negizgi aınalysatyn sharýashylyǵy osy eginshilik. Úsharaldy aıtpaǵannyń ózinde atalǵan aýdandardyń ózi keıde sýdan taryǵyp qalatyny jasyryn emes. Degenmen aýyldy sýmen qamtamasyz etý kórshi Qyrǵyz elimen baılanysty. Soǵan qaramastan aýyldaǵy azamattar úı irgesindegi jerlerdi tıimdi paıdalanýǵa árekettenip otyr.

–Jalpy, jobanyń maqsaty – úı irgesindegi jerlerdi tıimdi paıdalaný. Sondyqtan turǵyndar óz aýlalaryna kókónis egýdi qolǵa alyp otyr. Ashyǵyn aıtqanda, úı irgesindegi jerdi tıimdi paıdalaný úshin turǵyndar «Taraz» áleýmettik kásipkerlik korporasııasynan nesıe alýǵa qulshynys tanytyp otyrǵan joq. Sebebi olar sapaly tuqym men tyńaıtqyshtar alýy úshin kóp qarajatty qajet etpeıdi. О́z kezeginde

tuqym men tyńaıtqysh alý boıynsha olar jańadan qurylǵan aýyl sharýashylyǵy kooperatıvimen kelisimge kelip, solardan satyp alatyn bolady. Bul júıe turǵyndar úshin tıimdi bolyp otyr, – deıdi aýyl ákimi Rahymjan Orynbasaruly.