Sıfrlandyrylǵan aqparattyq ortalyq ashyldy

Búgingi tańda «Sıfrly Qazaqstan» memlekettik baǵdarlamasynda IT-qyzmet kórsetýdi damytý erekshe mańyzǵa ıe bolyp otyr. Osyǵan oraı, «Sıfrly Qazaqstan» baǵdarlamasy aıasynda óńir kitaphanalarynyń qoǵamdaǵy keńistigin damytý, olardy úzdiksiz ózgerip otyrǵan sharttarǵa beıimdelý maqsatynda aýdandyq ortalyq kitaphanaǵa qarasty aýyldyq kitaphanalarda sıfrlandyrylǵan aqparattyq ortalyqtar ashylýda.

Mine, osyndaı zaman talabyna saı qyzmet kórsetip otyrǵan ortalyq jýyrda T. Rysqulov aýdanyndaǵy Lýgovoı aýyldyq kitaphanasynan da ashyldy. Ashylý rásiminde ortalyqtandyrylǵan kitaphanalar júıesiniń dırektory Nursulý Topataeva quttyqtaý sóz sóılep, zamanaýı kóp fýnksıonaldy aqparat berý qyzmetterine jeke toqtalyp ótti. Aýdandyq sıfrlandyrylǵan aqparattyq ortalyqtyń kitaphanashysy Iskakova Alııa Altynbekqyzy aýyl turǵyndaryna egov.kz elektrondyq úkimet portaly arqyly qajetti qujattaryn rásimdep, memlekettik baǵdarlamalarǵa qatysty keńes berip ótti. Sonymen qatar, qadirli qonaq retinde shaqyrylǵan Lýgovoı aýyldyq ákiminiń orynbasary Qaırat Ábilov, aýyldyń aqsaqaldar alqasynyń tóraǵasy Rysbek Alchabaev alǵystaryn bildirdi.

Jalpy, aýdanda búgingi kúnge deıin aýdandyq kitaphanaǵa qarasty 11 aýyldyq kitaphanada sıfrlandyrylǵan aqparattyq ortalyqtar ashylǵan bolatyn. «Sıfrlandyrylǵan aqparattyq ortalyq ashý» tujyrymdamasynda kórsetilgendeı, ortalyqtar aýyl turǵyndaryna kórsetiletin elektrondyq aqparattyq qyzmet aıasyn keńeıtý, ártúrli sanattaǵy turǵyndardyń áleýmettik mańyzdy aqparattar men anyqtamalarǵa qoljetimdiligin arttyrý maqsatynda óz qyzmetterin usynýda. Sıfrlandyrylǵan aqparattyq ortalyqtarda jyldamdyǵy joǵary ınternet jelisi arqyly túrli aqparat izdeýmen qatar egov.kz portaly arqyly 12 qyzmet túrleri kórsetiledi. Onyń ishinde joǵary suranysqa ıe zeınetaqy qory anyqtamasy, balabaqshaǵa kezekte turǵany jaıly, jyljymaıtyn múlikter, azamattyń sottalǵan nemese sottalmaǵany týraly anyqtamalar alýǵa bolady. Bul shalǵaı aýyldardaǵy halyqtar aýdan ortalyǵyna baryp ýaqyt joǵaltpaıdy degen sóz.

Sonymen qatar, búgingi tańda ortalyq qyzmetkerleri http://zhambyl.cao-zhambyl.kz saıty arqyly jergilikti turǵyndardy aýyl, aýdannyń qoǵamdyq, mádenı, ekonomıkalyq, áleýmettik ómiri aıasynda jan-jaqty aqparatpen qamtamasyz etý múmkindigine ıe bolyp otyr.

«Sıfrlyq tehnologııalardy engizý – zaman talaby» deıtin bolsaq, sıfrlandyrylǵan aqparattyq ortalyqtar aqparat almasýǵa úlken múmkindikter jasap otyr. Endeshe, turǵyndardyń ıgiligi artyp, kitaphana isi árqashan alǵa basa beretini sózsiz.