Fermerler bas qosty

Sarysý aýdany ákimdiginiń májilis zalynda «Qazaqstan fermerler odaǵy respýblıkalyq qoǵamdyq birlestigi» Jambyl oblystyq fılıalynyń uıymdastyrýymen kezdesý ótti.

Jıynǵa aýdan ákimi Qanatbek Mádibek tóraǵalyq etip, «Qazaqstan fermerler odaǵy» Respýblıkalyq qoǵamdyq birlestiginiń Prezıdent-Tóraǵa mindetin atqarýshy Jıgýlı Moldahalyquly Daırabaev, aýdan boıynsha fermerler odaǵynyń tóraǵasy –Asqar Aqpanbaıuly Alıbekov, qala jáne aýyldyq okrýg ákimderi, ákimdik bólimder men mekeme basshylary, sharýa qojalyq tóraǵalary, kásipkerler qatysty.

Kún tártibine sáıkes aýdan boıynsha fermerler odaǵynyń tóraǵasy- Asqar Aqpanbaıulynyń habarlamasy tyńdaldy. Habarlamashy óz baıandamasynda Qazaqstan Respýblıkasy tuńǵysh Prezıdentiniń tapsyrmasy boıynsha Qazaqstan Respýblıkasynyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasy engizilip, baǵdarlamaǵa sáıkes qol jetkizýge baǵyttalǵan ındıkatorlardyń biri «aýyl sharýashylyǵy jalpy óniminiń (kórsetiletin qyzmetteriniń) 2015 jyldyń deńgeıine qaraǵanda naqty mánde 43%-ǵa ósýi» - 2019 jyldyń 9 aıdaǵy aýyl sharýashylyǵy óniminiń jalpy shyǵarylymy 9564,5 mln. teńge (2015 jylǵy 9 aıdaǵy aýyl sharýashylyǵy óniminiń jalpy shyǵarylymy 5473,1 mln. teńge), 2015 jyldyń 9 aıdaǵy deńgeıine qaraǵanda ósim qarqyny 74,8% bolǵandyǵyn aıta kelip, qol jetkizýge josparlanǵan kelesi kórsetkish - aýyl sharýashylyǵyndaǵy negizgi kapıtalǵa salynǵan ınvestısııalar kóleminiń 2015 jyldyń deńgeıine qaraǵanda naqty mánde 2,5 ese óskendigin aıtty. Sonymen qatar aǵymdaǵy jyldyń 9 aıdyń qorytyndysy boıynsha aýyl sharýashylyǵyndaǵy negizgi kapıtalǵa salynǵan ınvestısııalar kólemi, aǵymdaǵy jyly kúzdik bıdaı, pııaz, júgeri jáne baqsha daqyldarynan alynǵan ónim jaıly da tilge tıek etti.

Sondaı-aq aýdanda múıizdi iri qara, qoı men eshki, jylqy, túıe jáne qustyń ósimi men olardan alynǵan ónimderge de toqtaldy. Mal sharýashylyǵyn damytýdaǵy tıesili alynǵan sýbsıdııa, nesıe, jańa tehnıkalar jaıly da kópshilikti habardar etti.

Kelesi sóz kezegi «Qazaqstan fermerler odaǵy» Respýblıkalyq qoǵamdyq birlestiginiń Prezıdent-Tóraǵa mindetin atqarýshy –Jıgýlı Moldahalyqulyna berilip, jınalǵandar tarapynan suraqtar qoıylyp, jaýaptar qaıtaryldy. Sonymen qatar basqosýda oblystyq aýyl sharýashylyq salasyna qosqan úlesi jáne Qazaqstan fermerler odaǵy respýblıkalyq qoǵamdyq birlestiginiń jumystaryna belsene qatysqany úshin Sáken Tájibaevqa Qazaqstan Fermerler odaǵynyń maqtaý gramotasyn tapsyrdy.