Qordaıda aýqymdy joba júzege aspaq

Qordaı aýdanynyń ákimdiginde aýdan kásipkerleriniń Almaty qalasynan kelgen «Urbo Style» kompanııasynyń ókilderimen kezdesýi ótti. Qala qurylysy, sáýlet jáne landshafttyq jobalaý salasynda jobalaý jumystarymen aınalysatyn kompanııa aýdan damýynyń keshendik jobalaýyn qolǵa alǵan. Kezdesýge Jambyl oblysy ákimdiginiń kásipkerlik jáne ındýstrıaldy-ınnovasııalyq damý basqarmasynyń basshysy J.Sarıev, aýdan ákiminiń orynbasary M.Kúzerbaev, Qordaı aýdany ákimdiginiń kásipkerlik, óndiris jáne týrızm bóliminiń basshysy Q.Mámetov qatysty.

Jıynda birinshi bolyp sóz alǵan J.Sarıev is-sharanyń maqsatyn túsindirip, kásipkerler aýdannyń bolashaq damýy týraly oılaryn ortaǵa salyp, kompanııa ókilderi ony oblys basshylyǵyna jetkizip, aýdannyń jáne jalpy oblys damýynyń tıimdi joldaryn tańdaý qajettiligin alǵa tartty. Sonymen birge, kásipkerlerge óz oılaryn ashyq aıtyp, olardyń pikirleri eskeriletini aıtyldy. «Is-shara Jambyl oblysynyń aýmaǵynda qala qurylysyn damytý jáne oblys aýmaǵyn keshendi damytý sheńberinde ótkizilýde. Bul aýqymdy joba aıasynda damý strategııasy ázirlenip, ekonomıkalyq baza, áleýmettik sala, ınjenerlik jáne kóliktik ınfraqurylymnyń damýy kózdeledi», - dedi óz kezeginde «Urbo Style» kompanııasynyń dırektory Lıýbov Nysanbaeva.

Jıynǵa qatysqan aýdan kásipkerleri problemalardy talqylaýda belsendik tanytqanyn erekshe aıtýǵa bolady. Máselen, «Samǵaý» ShQ basshysy E.Trýbnıkov aýyl sharýashylyǵy salasyn nesıelendirý máselesin kóterdi. Kásipkerdiń aıtýynsha bankter aýyl sharýashylyq taýar óndirýshilerimen jumys istegileri kelmeıdi, al nesıe alǵan jaǵdaıda paıyzdary dıqandar úshin qolaısyz. Sonymen birge, sala úshin kadrlar tapshylyǵy sóz boldy. Jastar aýylda qalmaı, qalaǵa umtylyp nemese taksı júrgizýshi bolýdy qalaıdy. Al, aýylda mehanızatorlar aýadaı qajet. «Umtyl» ShQ basshysy B.Syrlybaev óz pikirin ortaǵa salyp, memlekettik kómek alý barysynda týyndaıtyn qıyndyqtardy jasyrmady. Qaǵazbastylyq, memlekettik qorlarda uzaq jáne jalyqtyratyn kelisim alý rásimi kásipkerlerdiń memleketten jeńildiktik nesıelerdi alý nıetin qaıtaryp jiberedi.  Dóńgelek ústel qatysýshylary áriptestirin qoldap, bul rásim 7-8 aıǵa sozylatynyn atap ótti. Kompanııa ókilderi kásipkerlerdi muqııat tyńdap, aıtylǵan talap-tilekter men problemalardy oblys basshylyǵyna jetkizýge ýáde berdi.