Kásipker aýylynan qos birdeı nysan saldy

Elbasy «Bolashaqqa baǵdar: rýhanı jańǵyrý» atty maqalasynda: «…Týǵan jerge, onyń mádenıeti men salt-dástúrlerine aıryqsha ińkárlikpen atsalysý – shynaıy patrıotızmniń mańyzdy kórinisteriniń biri», – degen bolatyn. Búginde elimizde týǵan jeri men aýylynyń baryn baǵamdap, joǵyn túgendeýge, perzenttik boryshyn óteýge nıetti azamattar qatary kóbeıip keledi.

Jýyrda Baızaq aýdany A. Sýhanbaev aýyldyq okrýgine qarasty Kókózek eldimekeninde Jasuzaq Aslanbek atyndaǵy sport kesheni paıdalanýǵa berilip, el ıgiligine usynyldy. Atalmysh sport keshenin ulynyń qurmetine arnaǵan jeke kásipker Asylbek Jantaev ekinshi nysan «Jantaı ata» meshitin kúrdeli jóndeýden ótkizýge atsalysyp, aýyl turǵyndarynyń rızashylyǵyna bólendi. Qos birdeı nysannyń saltanatty ashylý rásimine kelgen qonaqtar keshenniń sporttyń damýyna serpin bererine, jańa meshit ımandylyqtyń temirqazyǵy bolatynyna senimderin bildirdi.

Saltanatty sharada sóz alǵan aýdan ákiminiń orynbasary Dáýir Dáýletov sóz sóılep, kásipkerge halyqty sportqa tartyp jatqanyna zor alǵysyn bildirdi. Sondaı-aq, aýdan ákiminiń atynan Gramota tabys etti.

Budan soń ıgi tilekter jalǵasyn taýyp, aýyldyq aqsaqaldar keńesiniń tóraǵasy Jasuzaq Mombekov, eńbek ardagerleri sóz alyp, aýyl turǵyndarynyń qýanyshyna ortaqtasyp, jyly lebizderin bildirdi. Al, Jambyl oblystyq "Hıbatýlla-Tarazı" meshitiniń ókil ımamy Qanat Ádilhanuly meshitti qaıta kúrdeli jóndeýden ótkizip, jamaǵattyń erkin qulshylyq etýine qolaıly jaǵdaı jasap bergen saýapty isi úshin Qazaqstan musylmandary dinı basqarmasynyń Jambyl oblysyndaǵy ókildigi atynan oblystyń bas ımamnyń Alǵys hatyn tabys etti.

Jańa nysan aldyndaǵy kerilgen lentany elimizdiń maqtanyshy, sambo kúresinen Álem chempıony Almas Musabekov pen №1 olımpıadalyq mamandandyrylǵan balalar men jasóspirimder mektebiniń basshysy, qazaq kúresiniń túıe palýany atanǵan Salken Jartybaev qıdy. Sport kesheni men meshittiń ashylý qurmetine arnaıy as berilip, qasıetti Qurannyń súreleri oqyldy.

Budan soń Jasuzaq Aslanbek atyndaǵy sport kesheniniń ashylýyna arnalǵan sporttyq jarystarǵa kezek berildi. Onda shaǵyn fýtbol, qazaq kúresi, armrestlıng, voleıbol túrlerinen kórshiles aýdandar men óz aýdanymyzdyń aýyldyq okrýgterinen kelgen sportshylar kúsh synasty. Nátıjesinde jarys jeńimpazdary men júldegerleri uıymdastyrýshylar tarapynan taǵaıyndalǵan marapattarǵa ıe boldy. Tús aýa jarystar sońy ulttyq oıynymyz kókparǵa ulasty.