Bir shańyraq astyndaǵy shattyq kún

Dúngen halqynyń mádenıeti urpaqtan urpaqqa jalǵasyp jatqan salt-dástúrler, folklory, merekeleri men qundylyqtarynyń jıyntyǵy. Jýyrda Qordaı aýdanynyń Sortóbe aýylynda dúngen etnosynyń mádenıeti kúni keń kólemde atalyp ótýi sonyń aıǵaǵy dese bolady. Atalmysh merekeniń basty maqsaty etnostyń mádenıeti men salt-dástúrlerin kópshilikke tanytý jáne qazaqstandyq biregeı qoǵamdyq kelisim men jalpy ulttyq birlikti nyǵaıtý.

Is-sharaǵa Jambyl oblysy Qazaqstan halqy Assambleıasy hatshylyǵynyń meńgerýshisi, tóraǵa orynbasary Marjan Qujaeva, Qordaı aýdany ákiminiń orynbasary Beıqut Jamangozov, Jambyl oblysy Qazaqstan halqy Assambleıasynyń basshysy Rano Ýbaıdýllaeva basqarǵan atalmysh uıymnyń bir top músheleri, oblystyq dúngen mádenı ortalyqtarynyń «Vynhýa» qaýymdastyǵy, eńbek ardagerleri, aýyl aqsaqaldary, jastar, aýdandyq etnobirlestikterdiń ókilderi qatysty.

Sortóbe aýyldyq okrýginiń ákimi Ilıas Býlarov saltanatty túrde is-sharany ashqannan keıin, aýyldyq ortalyq kóshesimen sharaǵa qatysýshylar «Dostyq» marshyn júrip ótip, Uly Otan soǵysynyń ardagerleri men Noǵaıbaı bıge arnalǵan eskertkishterge gúl shoqtaryn qoıdy.

Qatysýshylar men qonaqtar dúngen halqynyń qoldanbaly ónerimen tanysyp, ulttyq taǵamdardan aýyz tıdi.

- Birlik, yntymaq pen rýhtyń myqtylyǵynyń arqasynda biz ekonomıkalyq damýǵa, azamattyq kelisimge qol jetkizdik. Etnosaralyq jáne konfessııa aralyq kelisimniń biregeı úlgisi bolyp tabylatyn Qazaqstan halqy Assambleıasy úlken jumys atqarýda. Munyń bári – Qazaqstan halqynyń birlesken eńbeginiń jemisi. Kelesi jyly elimizde Uly Jeńistiń 75, Ata Zańnyń 25 jyldyǵy atalyp ótedi. Oblysta 87 etnos turady. Bul degenimiz – birlik jáne «Rýhanı jańǵyrý», - dedi óz sózinde Jambyl oblysy Qazaqstan halqy Assambleıasy hatshylyǵynyń meńgerýshisi, tóraǵa orynbasary Marjan Qojaeva.

Dúngen etnosynyń mádenıeti kúni sheńberinde qoǵam belsendileri Qazaqstan halqy Assambleıasy jáne oblystyq dúngen mádenı ortalyqtarynyń «Vynhýa» qaýymdastyǵynyń gramotalary men syılyqtarymen marapattaldy. «Vynhýa» qaýymdastyǵynyń tóraıymy Aısha Idybo aýdandyq ardagerler keńesi men qoǵamdyq keńeske 100 myń teńgelik sertıfıkattardy tartý etti.

Al, is-sharaǵa qatysqan birqatar aqsaqaldarǵa, Noǵaıbaı bıdiń shóberesi Násıbeden Baratqanovqa, Marjan Qujaevaǵa syı-syıapat kórsetilip, ıyqtaryna dástúrge saı shapan men kamzol jabyldy.